Iqembu lomdlalo wenguqu eleHighlanders selithole imvunulo eyokugqoka nxa lizilolonga ivela kubasekeli balo abahlala kwele Bhilithani.
Iziphathamandla zeqembu leHighlanders ezibalisa umsekeli kamgcinisihlalo uModern Ngwenya, umqondisi weqembu uNhlanhla Bahlangene Dube, kanye lesikhulumeli seqembu uRonald Moyo yibo abayemukele impahla lezi ezivele phetsheya kolwandle namhla ekuseni.
Umsakazi olodumo njalo ongumsekeli weqembu leHighlanders omkhulu, uEzra Tshisa Sibanda, nguye obemele abalandeli beqembu leHighlanders abahlala kwele Bhilithani njalo uthe uNqobile Nkomo udlale indima enkulu ekudingweni kwempahla ezokuphathisa iqembu ngemva kokuzwa izikhalazo zenkokheli yeqembu.
“Sithe thina njengabalandeli beqembu siqoqe lezizinto ukuze abafana basebenzise. Njengabalandeli beqembu leHighlanders abanengi siyakhuluma kakhulu ikakhulu ebulenjini lapha ku-social media siyabanga umsindo singakwazi okwenzakala eqenjini.
“Kuqakathekile ukuba abalandeli babe ngamalunga eqembu njalo nxa kusenziwa ingatsha zabalandeli endaweni ezitshiyeneyo akungabangwa izikhundla kodwa kuqoqwe okokusebenzisa kuncediswe iqembu le Highlanders. Imali kayikho kwele Zimbabwe njengoba amankampani ayavala ikanti lemali okungenwa ngayo emagedini ayisalifikisi ndawo iqembu yikho kuqakathekile ukuba silincedise.”
UNhlanhla Bahlangene Dube uthe basamukela ngezandla ezivulekileyo isipho lesi lesivela kubalandeli beqembu.
“Abantu bangakhangeli kakhulu ukuthi nxa sifuqana sifuqanelana ukuba senze ngcono babe sebebona mhlawumbe angathi liqembu elilwayo hatshi akunjalo. Izifiso zethu ngoba siyatshiseka yikuthi izinto zenziwe ngendlela esisuthisayo sonke. Kancane kancane sikhuthazana sifuqanelana ebuhleni. Lokhu akwenziwa ngumuntu ozonda iqembu kodwa kwenziwa ngumuntu othanda iqembu lakhe yikho siyakubonga kakhulukazi.”
Umsekeli kamgcinisihlalo weqembu leHighlanders, uModern Ngwenya, ukhuthaze abanye abalandeli beqembu leli ukuba labo baliphathise hatshi ukuba bechothoza kuphela.
“Isifiso sami ngesokuthi abalandeli beBosso labo balethe izinto esizifunayo kangaka singahlupheki njengeqembu kulokuthi behlale bengabasolayo kuphela ebulenjini. Okwenziwe nguMdawini kuyasikhuthaza ukuba wonke omuntu oyithandayo iBosso engakhulumi kuphela kodwa ukuthanda iBosso kukhanya ngokwenza okuhle.”
Abalandeli beqembu le Highlanders abangaphetsheya kolwandle yibo abakade bebhadala iholo lomqeqetshi uHendrikus Pieter de Jong nyakenye.
Labo abahlala elizweni lase South Africa sebaqala uhlelo olokubuthanisa imali eyokuphathisa leliqembu abayitshaya nyangazonke njalo loluhlelo lukhokhelwa ngowayengumdlali weqembu leBosso, uAlexander Maseko.
Iqembu leHighlanders seliqalile amalungiselelo alo alonyaka njalo abasekeli bakamqeqetshi waleliqembu uMark Harrison, uMandla Mpofu kanye lo Bekithemba Ndlovu, yibo abasagijimisa abafana ngoba uHarrison, oyisizalwane sakwele Bhilithane, engakatholi imvumo eyokuba asebenze kwele Zimbabwe.
