UMongameli Emmerson Mnangagwa uthi abantu beZimbabwe kumele bahlalisane hatshi ukuthi balwe nsukuzonke bebanga ezombusazwe.
UMnangagwa wethule lokhu namuhla eNational Heroes Acre ngesikhathi kungcwatshwa umuyi uCallistus Ndlovu, obengumgcinisihlalo sebandla leZanu PF koBulawayo.
UNdlovu owaphuma kuZapu esithi ibandla leli elalikhokhelwa ngumuyi uJoshua Nkomo selinjengedonki efileyo, ubhubhe ngeviki ephelileyo.
Ukuze sizwe okunengi ngokwenzakale eNational Heroes Acre, sixhume uMnu. Joseph Tshuma, okudale leCentral Committee kubandla leli, othi uNdlovu wayefisa ukuthi abantu basebenze ndawonye.
Uthi abantu abakhonona ngokuhlamuka kuka Ndlovu kubandla leZapu kumele babekwazi ukuthi uNdlovu wayelelungelo lokungena kubandla leZanu eyayikhokhelwa nguMugabe elelisaziwa ngokuthi yiZanu Jongwe.
Uthi loba umuyi uLookout Masuku, owayekhokhela ivuyo leZipra wangcwatshwa koBulawayo, wanikwa isicoco seqhawe lesizwe.
Kusenjalo, owayengumongameli uMnu. Robert Mugabe ubeledili emzini wakhe weBlue Roof eHarare lokunanza iminyaka yakhe yokuzalwa. Useleminyanga engamatshumi ayisitshiyagalolunye lanhlanu - 95.
Ngesikhathi esifanayo, uMnu. Edmund Kudzayi, owayengumhleli wephephandaba leSunday Mail namuhla uhlawule isibambiso sebail kulandela ukubotshwa kwakhe eHarare esetheswa icala lokuthi utholakale ele Ambrella elemibala yebutho leZimbabwe.
