Umqeqetshi weqembu lenguqu ele Highlanders, uHendrik Pieter de Jongh usekhuthaze abalandeli baleli qembu ukuba babuye ngobunengi ukuzokulisekela emdlalweni walo owe final yalonyaka eyomncintiswano wenkezo ye Chibuku elizawudlala lele Ngezi Platinum Stars kusasa ngoMgqibelo.
Zonke indlela ziqonda enkundleni ye Barbourfields, koBulawayo kusasa ngoMgqibelo lapho iqembu le Highlanders elizangqikilana khona lele Ngezi Platinum Stars kudingwa intshantshu zalonyaka ezomncintiswano we Chibuku Super Cup.
Umqeqetshi weqembu leHighlanders uDe Jongh utshele intathelizindaba zemidlalo ukuba ukhangelele ukuba abalandeli beqembu leHighlanders bazadlala indima enkulu ekuphumeleleni kwaleliqembu lona elileminyaka embalwa lingazake liphakamise isicoco.
“Iqembu lethu yilo elilabalandeli abanengi elizweni njalo lakusasa ngikhangelele ukuba inengi labalandeli libe ngelisekela thina njalo kumele bahlabele kusukela umdlalo uqala uze ufike emaphethelweni,” kutsho u de Jongh.
Ukuze lifinyelele ukuyadlala ku final iqembu le Highlanders linqobe ele Dynamos nge 1 ka nya kuhlandla lakuqala elomncintiswano kuthi kusigaba se quarter – final linqobe ele FC Platinum nge 3 ka nya ikanti kusigaba se semi – final iqembu le Highlanders litshaye ele ZPC Kariba nge 1 ka nya.
Ngakwelinye icele iqembu le Ngezi Platinum Stars lona linqobe ele Mushowani Stars nge 2 ka nya kusigaba sakuqala esomncintiswano kwathi kusigaba se quarter – final linqobe iqembu le Black Rhinos nge 5 ka 3 ngemva kokutshaywa kwembekwa ikanti kusigaba se semi – final iqembu le Ngezi litshaye ele Harare City nge 7 ka 6 ngemva kokutshaywa kwembekwa.
Iqembu le Highlanders licine ukuphakamisa isicoco esizwayo ngomnyaka ka 2015 lapho elinqobe khona ele Chicken Inn nge 1 ka nya ku final eyenkezo ye NetOne ikanti iqqembu le Ngezi Platinum Stars lona liphakamise isicoco se Chibuku ngomnyaka ka 2016.
Loba kunjalo u de Jongh uthe utshele abafana bakhe ukuba bekungakufaki engqondweni ukuba sekuleminyaka embalwa leliqembu lingaphakamisanga inkezo kodwa bekholise umdlalo.
“Sengibatshele kanengi abadlali bami ukuba kabakholise amalungiselelo esiwenzayo silungiselela umdlalo we final baphinde njalo bakholise ukudlala kufinal ngoba phela lumdlalo uyafana nje leminye imidlalo kusithi umehluko kuyikuthi wona kumele ube lempumela owehlukanisa amaqembu womabili ekupheleni kwawo,” kutsho u de Jongh.
Nyakenye iqembu le Triangle yilo eliphakamise isicoco senkezo ye Chibuku ngemva kokunqoba ele Harare City nge 2 ka nya ikanti iqembu le Harare City yilo elisiphakamise ngomnyaka ka 2017 ngemva kokunqoba ele How Mine nge 3 ka 1.
Iqembu le Ngezi Platinum Stars yilo eliphakamise linkezo ngomnyaka ka 2016 ngemva kokunqoba ele FC Platinum nge 3 ka 1.
Iqembu le Harare City yilo eliphakamise inkezo ngomnyaka ka 2015 ngemva kokunqoba ele Dynamos nge 2 ka 1 ikanti ngomnyaka ka 2014 lapho lumncintiswano owavuselelwa khona iqembu le FC Platinum yilo eliphakamise linkezo ngemva kokutshaya ele Harare City nge 3 ka 1.
Iqembu eliphakamisa inkezo ye Chibuku yilo elimela ilizwe le Zimbabwe kumncintiswano we CAF Confederation Cup.
