amalinks wokungena

Breaking News

UMugabe Uxoxisana Lenkokheli yeChina Ngomnotho Welizwe


FILE - UMongameli Robert Mugabe ukhangelelwe ukuthi uzaphenduka ekhaya ephethe izandla.

UMongameli Robert Mugabe usefikile kwele China kuhambo lwakhe lokuyakhulumisana leziphathamandla zikahulumende labaqondisi bamankampani emizameni yokubakhuthaza ukuthi bazovula amabhizimisi eZimbabwe.

UMugabe ohambe lemuli yakhe leziphathamandla zikahulumende ezimbalwa, ukhangelelwe ukuxoxisana lenkokheli ye China ngokuthi zingenzani ngokuvuselela umnotho weZimbabwe osubhidlika ngenxa yamankampani ehluleka ukulungisa impahla enengi yokuthengisa kwamanye amazwe.

Ele Zimbabwe lihlutshwa yikungatholi imali yakwamanye amazwe yokuvuselela umnotho owaqalisa ukuwa okwesabekayo kulandela ukhetho lwanyakenye okwanqoba ibandla likaMugabe eleZanu PF.

Ubudlelwano beZimbabwe leChina baqalisa ngesikhathi sempi yenkululeko baqhubekela phambili ilizwe lisabuswa libandla leZanu PF kungakabunjwa uhulumende womanyano.

Ilizwe lokhe lidlelana leleChina ngaphansi kohlelo lwe-Look East Policy.

Ababona ngokwenzakala kumnotho welizwe bathi uhlelo lolu kalukaletheli lutho eleZimbabwe lobanje izizalwane zeChina sezidlalela emagumeni eHarare nsukuzonke zidinga okutshiyeneyo okugoqela amadayimana, amapulazi lokunye.

Ingcwethi kwezombusazwe, uMnu. Dumisani Nkomo, okuhlanganiso ezimele yodwa eyeHabarkuk Trust utshele iStudio 7 ukuthi uMugabe ukhangelelwe ukuthi uzaphenduka ekhaya engaphathanga lutho.

XS
SM
MD
LG