Izizalwane zakwele China eziyisikhombisa bezisemthethwandaba namuhla eVictoria Falls lapho obekumele zithoniswe icala lokutholakala zilempondo zabobhejane ezilesisindo esifika phose isigidi samadola - $900,000.
Zetheswa icala lokwephula iziqondiso zomthetho weParks and Wildlife Act ngokuthi kuthiwa zatholakala zithwele impondo lezi okungekho emthethweni.
Umantshi uNkosazana Rangarirai Gakanje uvumelane lomtshutshisi, uMnu. Bhekimpilo Tshabalala, ukuthi sokuthethe isikhathi eside abantu laba bengakathoniswa icala leli emthethwandaba.
Udaba lolu lukhangelelwe ukuthi luzathethwa mhlaka 9 ngoZibandlela.
Abayisikhombisa laba, ababotshwe ngeviki ephelileyo njalo abamelwe nguMnu. Givemore Mvhiringi, bayaliphika icala leli. Impondo zikabhejane zingumuthi wemacansini kwele China.