Izisebenzi eHarare ngoLwesibili zikhuthazwe ukuba zingavoteli uMongameli Emmerson Mnangagwa lebandla lakhe leZanu PF kukhetho oluzayo ngoba befanana xathu lowayengumongameli uMnu. Robert Mugabe, owahluthunelwa umbuso libutho libambisana loMnangagwa nyakenye.
Lokhu kuphume embuthanweni wokunanza usuku lwezisebenzi emhlabeni jikelele, eleWorkers’ Day owenzelwe eHarare.
Umkhokheli wenhlanganiso yeZimbabwe Congress of Trade Unions (ZCTU), uMnu. Peter Mutasa, utshele izisebenzi ukuthi ukhetho lwalonyaka luzanika abantu ithuba lokuguqula uhulumende kungene abantu abalenhliziyo zokusebenzela uzulu.
Lokhu kusekelwe nguMnu. Japhet Moyo, unobhala jikelele weZCTU, othe uhulumende kaMnangagwa kakwazi ukuphatha izisebenzi.
Ufake umzekeliso wokwethulwe ngumsekeli kamongameli, URetired General Constantino Chiwenga, owaxotsha abongi okungekho emthethweni ngesikhathi betshengisela bekhonona ngeholo eliphansi.
UMoyo uthi lokhu kumele kubeyisibonele esiphezulu ebantwini okumele bavote ngonanzelelo kukhetho oluzayo.
Abavele enhlanganisweni ezitshiyeneyo ukuzaxhasa izisebenzi, baveze ukukhathazeka ngendlela uMnangagwa lo Chiwenga abaziphatha ngayo besithi kukhomba ukuba kabalani lezisebenzi.
Baxwayisa uChiwenga ukuba ehlukane lomkhuba wokub’elokhe eziphatha njengomkhokheli webutho, ekhohlwa ukuba sewawutshiya lowo msebenzi.
Umkhokheli welinye lamabandla aphikisayo ele MDC-T, uMnu. Nelson Chamisa, obekulomkhosi enxuswe ngabe ZCTU, utshele uzulu ukuba uMnangagwa loMugabe bayafana nje ngoba kungabantu banye abasebenza bonke okwesikhathi eside ngakho akekho omsulwa phakathi kwabo.
Lanxa abe ZCTU besithi bebemnxusile uhulumende kusukela kumongameli kusiya kumphathintambo wezisebenzi lenhlalakahle kazulu, kabazange babe khona kulomkhosi.
Umkhosi lo ungenwe zinhlanganiso ezisebenzelana lozulu kwezokulwela ilungelo loluntu, ezimela abaqondisi bamankampani, abaze bemmele inhlangothi zenhlanganiso yomanyano wamazwe omhlaba wonke jikelele eyeUnited Nations, abamabandla ezombusazwe aphikisayo kanye lezisebenzi.
