amalinks wokungena

Breaking News

Abakhokhela Uhulumende eZimbabwe Bethuswa Yikubhubha Kwabanye Babo Okuthakazelelwa Ngabanye Abantu


Bamelele ukungcwaba obeyisiphathamandla sikahulumende, Harare, Thursday, Jan. 21, 2021.

Bethuke kakhulu abakhokhela uhulumende wakwele Zimbabwe kulandela ukubhubha kwabanye babo asebebulewe ngumkhuhlane weCOVID-19.

Kulabantu abahoza uhulumende ngokwenzekalayo besithi kulenkokheli yebandla leZanu PF engalandeli iziqondiso zokuvimba ukumemetheka komkhuhlane weCoronavirus.

Iziphathamandla zikahulumende ezisanda kubulawa ngumkhuhlane weCOVID-19 zigoqela obephethe uhlangothi olubona ngokudlelana lamanye amazwe uRetired Major General Sibusiso Moyo, obephethe uhlangothi lokuthwalwa kwempahla uJoel Biggie Matiza lobekhokhela isabelo seManicaland, uNkosikazi Ellen Gwaradzimba.

Abanye ababekuhumende asebebulewe ngumkhuhlane lo ngowake wakhokhela iFifth Brigade lohlangothi lwezokulima uPerrance Shiri, owayephethe uhlangothi lwezibotshwa uParadzai Zimondi lowayephethe uhlangothi lwezemfundo uAeneas Chigwedere.

Kubikwa ukuba inengi lalabo abaphethe inhlangothi zikahulumende sebesukile emadolobheni bayahlala emapulazini abo ukwenzela ukuthi bengathaphi igciwane leCOVID-19.

UMongameli Emmerson Mnangagwa utshele abantu ngoMgqibelo ukuba umkhuhlane lo kawukhethi muntu lobanje kukhanya engani selisibaphansi inani lababulawa yiCoronarivus.

“Sesisethusa lesi simo njalo sitshengisa ukuba sizaqhubeka sisibi kodwa ithemba lisasekhona njengoba sesibona inani lasebesinda kiwo seliqonga.”

UDokotela Garry Shava uthi abantu kumele balandele iziqondiso zeCOVID-19 lockdown lalokhu okwethulwa yinhlanganiso yeWorld Health Organization.

“Umkhuhlane lowu kawukhethi muntu awukhethi sikhundla, awukhethi ukuthi ulemali kumbe uyadubeka, kawukhethi njalo ukuthi wena ulakho konke kumbe uyaswela. Kodwa sonke sisengozini yalumkhuhlane ngokunjalo kumele sihlangane, sincedisane ukuthi siwulwise umkhuhlane lowu. Ngokunjalo awula kuthi ungowohlangothi lolo kumbi ungowohlangothi olunye, kodwa sonke sisengozini ngokufanayo.”

UMnu. Believe Gaule, owebandla leZanu PF, uthi kumele abantu bazivikele kumkhuhlane weCOVID-19.

“Kudinga ukuthi sibili kakhulu, abantu bazivikele ngokulandela sibili imithetho yona leyana ebekiweyo, eyiyo evikelayo abantu, yikho okuqakathekileyo kakhulu. Kuziphathamandla kakhulu, lakho kutsho ukuthi ngesikhathi sekhefu lapha, kube lokuyekethisa okuthize, abantu sebebona umkhuhlane ungani uyehlile. Yikho okubangele ukufa lokhu kube phezulu kakhulu lomkhuhlane usumemetheke kangaka.”

Kulabanye abantu enkundleni zokuxhumana abahleka baze baqethuke ngokubhubha kweziphathamandla zikahulumende besithi le yindlela uNkulunkulu alungisa ngayo ezombusazwe eZimbabwe. Iziphathamandla zikahulumende ezinjengo Mnu. Nick Mangwana zithi akulabuntu lokhu. UMnangwana wethule umbiko enkundleni yokuxhumana eyeTwitter esithi umkhuhlane weAIDS wathi ungena emphakathini akulamuntu owahleka omunye. Lokhu kusekelwa nguMnu. Witness Dube, isikhulumeli sebandla leMDC-T.

Uhlangothi lwezempilakahle luthi kulabantu abalitshumi lambili – 12 ababulewe ngumkhuhlane weCOVID-19 eZimbabwe izolo kwathi abafika phose amakhulu amahlanu – 484 bahlolwe batholakala belomkhuhlane lo.

Luthi sokulabantu abedlula inkulungwane ezingamatshumi amathathu – 31,000 asebehlolwe kusukela ngoMbimbitho nyakenye batholakala bele COVID-19. Abedlula inkulungwane ezingamatshumi amabili – 21,377 sebaphepha kumkhuhlane lo, osubulele abafika phose inkulungwane – 974 eZimbabwe.

Bethukile Abakhokhela Uhulumende Wakwele Zimbabwe Ngokubhubha Kweziphathamandla Zelizwe
please wait

No media source currently available

0:00 0:03:29 0:00


Facebook Forum

XS
SM
MD
LG