Banengi abantu abakhonona ngokwenzala eZimbabwe lobanje bekwazi ukuthi umkhuhlane lo uyabulala.
Abaswelayo bacabanga ukuthi uhlelo lokuhlala ezindlini lunceda abanothilayo njengoba bona bephila nzima kulez’insuku.
UNkosikazi Samantha Majoni, umkhokheli womkhankaso wokulwisana lokumemetheka komkhuhlane weCOVID-19 obizwa ngokuthi Present-Danger #Coronavirus Zimbabwe Campaign, uthi abayanga badla imbuya ngoluthi.
“Hayi iLockdwn le isingifundise elinye iqiniso ekade ngingalazi lapha emhlabeni ukuthi abalemali sibili yibo abazoyenzelwa into yonke ihambe kibo kodwa mina engingela mali engithengisa amatamatisi yimi esengizihlalele lapha sengibambe ikhanda ngingasazi ukuthi ngife ngeCorona kumbe ngife ngendlala.”
Kodwa abezombusazwe abakhulume leStudio 7 bathi abantu bonke babhekane lokufanayo hatshi ukuthi uhlelo lolu ngolwabantu abaswelayo.
Bathi labo kabavunyelwa ukuzenzela santando ngoba lumkhuhlane kawukhethi muntu.
Isikhulumeli sebandla leZapu, uMnu. Iphithule Thembani Maphosa, uthi abantu bakhakhamele.
“Sibhekane le unemployment ezaba khona, ukulahlekelwa ngama incomes ngabantu abanengi bephinde njalo bevalelwe bengayenelisi ukuthi bephume phandle besiyaphanda. Yiyo into esiyesaba kakhulu, ezasidalela indlala ezasidalela njalo ama civil unrest endaweni ezinengi emhlabeni.
“Kuzadala nje ukuhlupheka okwengeziweyo phezu komkhuhlane okhona, kusithola singalungiselelanga njalo asila lwazi olujulileyo ngendaba leyi eye Coronavirus ukuthi siyilwise njani.”
UNkosazana Varaidzo Phiri, okubandla leLabour Economists and African Democrats, uthi uzulu uthithibele njalo uhlutshwa ngokwenziwa ngamapholisa lamasotsha eZimbabwe.
“Yona iGovernment yakhuluma yathi siyakwanisa ukuhamba five kilometres sithenge lokho esikuthengayo, sivakatshela izihlobo zethu ezigulayo kumbe ezidinga uncedo kodwa asisakukwanisi lokho ngoba sebesithi sihlale sisezindlini. Ogogo bethu asisakwanisi ukuthi siyebakhangela, abahlala bodwa, abahlala lezizukulwane ezincane.
“Besicela ukuthi iGovernment ilungisise khona lapho ngoba kunje khathesi asisakwanisi ukuthi abafana bethu ukuthi even beyeluse inkomo, asisakwanisi ukuhambisa inkomo zethu edibha ngoba abafana sekuthiwa bebuyele beyehlala one ndawo.”
Banengi abathi kunzima okubhekane lozulu. UNkosikazi Abigail Mupambi, okunhlanganiso ye#ThisConstitution, ugcizelela esithi kunzima ukulandela iziqondiso ezethulwe nguhulumende ezokulwisana lokumemetheka komkhuhlane weCoronavirus.
Abalandela ukholo lweSiKhristu abakunhlanganiso yeZimbabwe Catholic Bishops’ Conference labo bathi bakhathazekile ngokwenzakala emhlabeni wonke jikelele njalo langokuqhutshwa kohlelo lokuhlala ezindlini eZimbabwe abathi kalwethulwanga ngemfanelo. Omunye wabakhathazekileyo nguBishop Raymond Mupandasekwa.
“Siyalingwa kwezokuthi silungiselele okunganani inkokheli iyalingwa layo. Senze njani ukuzivikela kuleligciwane eseliphakathi kwethu?. Kulihlazo ukuthi lisithole vele singalungiselelanga lakancinyane leligciwane. Sijwayele ukuyakwelatshwa kwezinye indawo, sokumele selayshwe ekhaya, lapho kungasela lutho khona.”
Abantu kwele Zimbabwe bathi sebethembele kuNkulunkulu njengoba kukhanya engani umkhuhlane lo ulakho ukumemetheka elizweni leli.
