amalinks wokungena

Breaking News

Umkhuhlane weCoronavirus Utshiya Abezemidlalo Bebambe Owangaphansi


Umgcinisihlalo weBulawayo Volleyball Association uWiliam Mazviro. (Photo: Joseph Njani)

Babhekane lensindabephenduli abezemidlalo ngemva kokumiswa ukudlala kuyimizamo eyokunqabela ukumemetheka komkhuhlane we Covid 19.

Isinqumo esithethwe nguhulumende wakwele Zimbabwe esokuba kumiswe ukubuthana kwabantu abedlula ikhulu ngemva kokuqhamuka komkhuhlane we Covid 19 wona obangelwa ligciwane le Corona sekudale ukuba abezemidlalo etshiyeneyo labo bemise inhlelo zabo.

Lokhu sekudale ukuba kudluliselwe phambili ukuqala kwemidlalo etshiyeneyo efana leye Castle Lager Premier Soccer League.

Isikhulumeli seqembu lomdlalo wenguqu ele Highlanders uRonald Moyo uthi ukumiswa kokuqala kwemidlalo kuzalethela amaqembu inkinga ezinengi.

Ronald Moyo.(Photo: Joseph Njanji)
Ronald Moyo.(Photo: Joseph Njanji)

“Amaqembu abelungiselela isizini ekhangelele ukuthi iyaqala ngoMbimbitho kodwa ngomkhuhlane lowu imidlalo isidluliselwe phambili okutsho ukuthi khathesi sekuzamele baqale phansi.

Ngizakupha umzekeliso wabaqeqetshi. Abaqeqetshi nxa belungisa inhlelo zabo balungisa bekhangele ukuba nxa imidlalo iqala abadlali bayabe sebeqine kangakanani njalo khathesi sekuzamele bebone ukuba abafana laba bazakwala belokhu beqinile njalo akusiyonto elula leyo,” kutsho uMoyo.

UMoyo uqhubekele phambili wathi amaqembu amanengi athola imali ivela emagedini izibukeli zibhadala ukuba zingene ebholeni njalo asezathwala nzima ukuthola iholo labadlali bona okumele behole ngoba beqhatshiwe.

Umgcinisihlalo we Bulawayo Volleyball Association uWilliam Mazviro uthi labo njengenhlanganiso sebemise zonke inhlelo zabo kulandela isinqumo esithethwe nguhulumende.

“Kulandela ukumiswa kwemidlalo yonke ebilungiselelwe yinhlanganiso ye Zimbabwe Volleyball Association lathi njenge Bulawayo Volleyball Association sikubone kufanele ukuba simise imidlalo yethu obekumele ibekhona.

Sikubone kungcono ukuthi abantu baphephe ngoba singelawo amandla okumelana lomkhuhlane lo nxa ungaqhamuka,” kutsho uMazviro.

Isiphathamandla se Bulawayo Metropolitan Darts League uNhlanhla Sibanda yena uthi bazalandela isinqumo esithethwe ngabe National Darts Association esokumisa imidlalo loba nje abadlali bekhonona.

“Umdlalo wethu wama darts uphambaniseke kakhulu ngendaba ye Corona virus.

Abadlali bama darts bayakhonona ukuthi kanti baze bathiwe bengaqhubekeli phambili lemidlalo khona umdlalo wama darts uyabe ulabantu abangafiki amatshumi amathathu nje kuphela.

Emabhasini kuyabe kulabantu abafika ikhulu kusithi ezitimeleni kuyabe kulabantu abafika amakhulu amahlanu kodwa kuthiwe abama darts kabame.

Sisithatha sinjalo lesosinqumo njengoba sivele kuNDAZ njengoba kuyibo abalawula umdlalo wama darts elizweni,” kutsho uSibanda.

Umongameli welizwe le Zimbabwe uEmerson Mnangagwa ngoLwesibili uthe isimo kasilunganga ngenxa yomkhuhlane weCoronavirus njalo walaya ukuba abantu beke bame ukubuthana bedlule ikhulu okwensuku ezingamatshumi ayisithupha.

Facebook Forum

XS
SM
MD
LG