amalinks wokungena

Breaking News

Abantu Bafuna Iqembu leZimbabwe Warriors Lingqikilane Lele Algeria eBarbourfields Stadium


URonald Ncube ngomunye wabafuna iqembu lama Warriors lidlale umdlalo walo leleAlgeria enkundlei yeBarbourfields Stadium. (Photo: Joseph Njanji)
URonald Ncube ngomunye wabafuna iqembu lama Warriors lidlale umdlalo walo leleAlgeria enkundlei yeBarbourfields Stadium. (Photo: Joseph Njanji)

Abalandeli bomdlalo wenguqu bathi kungasake kuye ngasifudlana iqembu lama Warriors livunyelwe ukudlalela enkundleni yeBarbourfields mhla zingamatshumi amabili lathoba munwe munye.

Kulemibiko ethi inkokheli zenhlanganiso yeConfederation of Southern African Football Associations (COSAFA) ziqhube umhlangano lenkokheli yenhlanganiso yeConfederation of African Football (CAF) kuhlaziywa indaba eyokwalelwa kwelizwe leZimbabwe ukuba lisebenzise inkundla zalo kumidlalo yalo lamanye amazwe.

Lokhu sekuphe ithemba abalandeli bomdlalo wenguqu abakhathazeke kakhulu ngesikhathi kuphuma udaba olokuba inkundla yeBarbourfields layo isifakwe kuluhlu lwenkundla ezingalungelanga ukudlalela kuzo.

UMelusi Ndlovu, isakhamuzi selokitshini lePumula, ukhuthaza ukuba kuphangwe kulungisiswe inkundla ukuze izikhalazo zenhlanganiso yeZimbabwe Football Association zizwakale ngcono.

“Khona vele akwenzi ukuba bayedlala eSouth Africa kumele kube lontshintsho kukhanye ukuba kukhona abakwenzayo inkundla ziyalungiswa. Kunxele ukuba iqembu lama Warriors lizithole selisiyadlalela emzini lalapho kumele kube yilo iqembu elidlala lingekhaya. Inkundla kazilungiswe,” kutsho uNdlovu.

Umbono kaNdlovu usekelwe nguRonald Ncube yena othi ukungadlaleli ekhaya kweqembu lama Warriors kungabisela emuva umdlalo wenguqu kwele Zimbabwe.

“Umdlalo wethu uzathuthuka njani nxa sesisiyadlalela phandle kwelizwe loba kumele sidlale singekhaya. Kumele kudingwe imali kulungiswe inkundla hatshi ukuba sibe ngabantu ababonela izinto kwabanye abantu ngoba khonalokhu ngokunye okusibisela emuva njengabantu,” kutsho uNcube.

Omunye njalo ohlala koBulawayo, uS’dani Dlodlo, uthi ukuvalelwa kwelizwe leZimbabwe ukusebenzisa inkundla zalo kungaba lomthelela omuhle ekucineni ngoba nanko phela sekulemizamo eyokulungisisa inkundla.

“Asithembeni ukuba lokhu kube yisifundo kunhlanganiso ye Zifa lohulumende ukuba bengabi lomkhuba owokuhlalela izinto ngoba phela lokhu okusihluphayo yizinto ezakhulunywa kudala ngama 90s.

"Asithembeni futhi ukuthi kuzahle kulungisiswe okunengi ngoba nanko phela sekulokusebezelana ndawonye kwengatsha ezehlukeneyo ndawonye lomphakathi ukuze singabi yinhlekisa njengelizwe,” kutsho uDlodlo.

Kulemibiko ethi owake waba yisiphathamandla senhlanganiso yePremier Soccer League njalo engumnikazi weqembu leLengthens, uBeadle Musa Gwasira, uthe uzakupha ikhansili yako Bulawayo izamende ezilikhulu ezizasentshenziswa ekwakheni lokho okumele kwakhiwe enkundleni yeBarbourfields.

UGwasira kubikwa uthe uzafaka lama fridge emakamelweni abonompembe kanye lalabo abahlola abadlali ukuba kabasebenzisi yini izidakamizwa.

Inhlanganiso yeZifa kumele namuhla itshele inhlanganiso yeCaf ukuba isithethe sinqumo bani phezu kokuba kuzadlalelwa ngaphi umdlalo weqembu lama Warriors lele Algeria kodwa isikhulumeli senhlanganiso yeZifa, uXolisani Gwesela, uthe akukabi lesinqumo esesithethwe.

Inhlanganiso yeCaf kubikwa ithe inhlanganiso yeZifa ilakho ukuba ikhethe ukubiza njalo abazohlola inkundla yeBarbourfields kumbe ihle ikhethe inkundla engaphandle kwelizwe okuyiyo okuzadlalelwa khona.

Udaba Esilethulelwe NguJoseph Njanji
please wait

No media source currently available

0:00 0:02:51 0:00


XS
SM
MD
LG