amalinks wokungena

Breaking News

Abavangeli Bakhuthazwa Ukuba Balwisana Lokumemetheka Kwegciwane leCOVID-19


Inkokheli yamabandla ezokholo lweSiKristu ikhuthazwa ukuba ikhokhele ekukhuthazeni abazalwane ukuba bayehlatshwa ijekiseni yokuzivikela kuCOVID-19.

Bacelwe njalo ukuba baqhube imingcwabo ngonanzelelo olukhulu, kulandelwa iziqondiso zokuzilondoloza kulolubhubhane, ezabekwa ngabenhlanganiso yomanyano wamazwe womhlaba, iWorld Health Organisation kanye lohulumende.

Linkuthazo yenziwe ngabenhlanganiso yomanyano wamabandla ezokholo lweSiKhristu eyeZimbabwe Council of Churches (ZCC) ngesikhathi ilizwe libhekane lobunzima bokuqonga kwenani labatholakala beleCOVID-19 labalahlekelwa yimiphefumulo, oselukugagasi lesithathu i3rd wave.

Unobhala weZCC, uMfundisi Kenneth Mtata, uthi yikho lokhu okwenze bakhuthaze inkokheli emabandleni ukuba ikokhele imikhankaso yokuqakatheka kokuthi abantu bazivikele ngazo zonke indlela kumkhuhlane weCOVID-19.

“Isiminengi imibiko esesiyithola ngosekusenzakala phezu komonakalo omkhulu osubangelwa yileligagasi lesithathu lobhubhane lweCOVID-19, sekulabanengi asebelahlekelwe yimiphefumulo, kubazalwane labafundisi.”

Esinye isakhamuzi sakoBulawayo, uNkosikazi Pauline Sibanda, uyayisekela linkuthazo eqondiswe kubazalwane.

“Lami ngivumelana loGeneral Secretary weZCC ukuthi abantu kumele bangabuthani, bengahlali bengabantu abanengi njalo balandele iziqondiso zeWorld Health Organisation ezithi abantu kumele basanitayize, bagqoke ama-mask, bahambe baye kuma vaccination centres bayehlatshwa ukuze kuvikelwe lumkhuhlane osuqede abantu kangaka. Ngivumelana lakho ukuthi abantu kumele siziphathe ngendlela efunelwa yi World Health Organisation ukuze sibe safe sonke.”

UMnu. Tafadzwa Chigandiwa, oyintathelizindaba esebenza izimele ngomunye wabavumelana labe ZCC.

“Sibona kuyinkuthazo eqakathekileyo sibili. Ama-Church kumele abone ukuthi abazalwane bayahlatshwa njalo bayalandelela okukhulunywa yiWHO kanye le-government mayelana ngobhubhane lolu lweCOVID-19.

Umqondisi obona ngokuqhutshwa kwenhlelo zokulondolozwa kwabantu kuCOVID-19, uChief Coordinator for the National Response to COVID-19 Pandemic in Zimbabwe, uDokotela Agnes Mahomva, uthi kumqoka ukuba inhlangothi zonke zempilo okugoqela abezokholo, zisebenzisane ekulwisaneni lalolubhubhane oseludale umonakalo omkhulu elizwe lasemhlabeni jikelele.

Linkuthazo yabe ZCC, iza ngesikhathi sebesedlula inkulungwane ezingamatshumi ayisifica munwe munye - 91,120 asebetholakale belalolubhubhane selokho lwaqhamukayo ngenyanga kaMbimbitho nyakenye, kwasila abafika phose inkulungwane ezingamatshumi ayisithupha – 59,627 kuthi abafika phose inkulungwane ezintathu babo – 2,809 balahlekelwa yimiphefumulo.

Abezempilakahle babika ukuba baphose bafike inkulungwane ezintathu - 2,705 abahlolwe bafunyanwa beleCOVID-19, ekutshoneni kwelanga layizolo langoLweSithathu kwabhubha abangamatshumi ayisithupha lambili - 62 Deaths.

Facebook Forum

XS
SM
MD
LG