Ilizwe leZimbabwe likhangelelwe ukuthi ngoMvulo lizakwamukela amajekiseni eCovaxin, awokuvikela abantu kumkhuhlane weCOVID-19, eliwanikwe ngele India.
Iphephandaba leHerald libika ukuthi amajekiseni la azinkulungwane ezingamatshumi ayisikhombisa lanhlanu – 75,000 azakwamukelwa yiziphathamandla zikahulumende. Amajekiseni la azasetshenziswa kanye kanye leSinopharm leSinovac atholakala kwele China.
UMongameli Emmerson Mnangagwa usanda kuhlatshwa ijekiseni yeSinovac phansi kwehlandla lesibili sohlelo lokuhlatshwa kwabantu amajekiseni kusenzelwa ukuvimba ukumemetheka komkhuhlane weCOVID-19, osubulele abantu abedlula inkulungwane lengxenye – 1,519 eZimbabwe.
UDokotela Agnes Mahomva, okhokhela uhlelo lokuvimba ukumemetheka kwegciwane leCOVID-19 ewofisini kamongameli, usanda kwethula umbiko okhuthaza abantu ukuba behlatshwe amajekiseni avuselela amasotsha omzimba alakho ukulwisana legciwane leCoronavirus.
“Abanganelisi ukuba bahlatshwe okufana labantwana abancinyane, lalabo abagula kakhulu bathembele kwabanye ukuba balihlatshwe lelijekiseni. Ngenye indlela sithi nxa kungaba labantu abanengi abalihlatshwayo lelijekiseni, kwenza labo bantu abangahlatshwayo babe ngabavikelekileyo.
“Kuyilaba bantu abalihlatshiweyo ijekiseni abalondoloza labo abangazange balihlatshwe. Hambani liyehlatshwa lelijekiseni ukwenzela ukuthi kungabi yithi kuphela esivikelekileyo kulomkhuhlane, sibone ukuthi bavikelekile labo abanye bethu abangasoze benelise ukulihlatshwa.”
USikhwicamfundo Elopy Sibanda, umqondisi wenkampani yeGamma Medical Laboratories, uyakusekela okwethulwa nguDokotela Mahomva.
“Ngizasebenzisa umzekeliso wesando. Isando yiso esitshaya ngaso izipikili, ungabe ubethela izipikili njalo nje, sizacina sesingani siyapheca, siyabhenda. Le virus injalo, iyabe itshaya umuntu, umuntu laye elokuvikela azivikela ngakho. Angazivikela ngendlela azivikela ngayo, uyakwanisa ukuyithundubeza ivirus kumbe njalo ayenze ibe bukhali. Yikho lokho esithi ngama mutations, nxa ama-virus emanengiphakathi kwabantu, ama chances emutation lawo ayanda.”
Kodwa kulabanye abantu abalokhu bethandabuza indlela abantu abahlatshwa ngayo amajekiseni besithi uhulumende kungani kaphumeli egcekeni ngokusetshenziswa kwamajekiseni okuvimba ukumemetheka komkhuhlane weCOVID-19. Omunye wabo nguMnu. Godknows Masuku.
Uhlangothi lwezempilakahle lubika ukuthi abantu asebehlatshwe amajekiseni okuvuselela amasotsha omzimba okulwisana legciwane leCOVID-19, bedlula inkulungwane ezingamatshumi ayisithupha lanhlanu – 65,466 elizweni lonke jikelele. Luthi kusukela ngoMbimbitho nyakenye, sokulabantu abedlula inkulungwane ezingamatshumi amathathu lasithupha – 36,818 asebetholakale beleCOVID-19 kwaphepha abedlula kancane inkulungwane ezingamatshumi amathathu – 34,575.
