amalinks wokungena

Breaking News

Abanye Abantu eZimbabwe Bathi Bayesabe Ukuhlatshwa Amajekiseni Okuvuselela Amasotsha Omzimba Alwisana leCOVID-19


FILE: Ulungiselela ukuhlaba abantu eHarare. (Columbus Mavhunga/VOA)

Kulabanye abantu eZimbabwe asebehlatshwe amajekiseni okuvuselela amasotsha omzimba okulwisana legciwane leCOVID-19 abakhala ngezinyalo zomzimba labanye abathi kabasoze bahlatshwe ngenxa yokwesaba.

Uhlangothi lwezempilakahle eZimbabwe lubika ukuthi sokulabantu abedlula inkulungwane ezingamakhulu amathathu - 324,488 asebehlathwe okwakuqala amajekiseni okuvuselela amasotha omzimba alakho ukulwisana legciwane leCOVID-19. Luthi abahlatshwe okwesibili bafika phose inkulungwane ezingamatshumi amahlanu - 47,611.

Umkhuhlane weCOVID-19 usubulela abantu abedlula inkulungwane lengxenye eZimbabwe – 1,556. Loba kunjalo, abanye abantu bathi kabasoze bahlatshwe amajekiseni agoqela eyeSinopharm eyahluzwa kwele China. Abanye njalo asebehlatshwe amajekiseni la, bakhala ngezinyalo zomzimba. Omunye wabo nguNkosikazi Rosemary Musariri, ohlala koBulawayo.

UNkosikazi Rachel Moyo, laye ohlala koBulawayo, uthi wagula kancane esanda kuhlatshwa ijekiseni kodwa okwamanje usengcono emzimbeni.

Lokhu kwethusa uMnu. Benedict Ngwenya, ohlala eMakokoba koBulawayo.

Banengi abanjengo Mnu. Ngwenya abathi kuzakuba nzima ukuthi bayehlatshwa amajekiseni okuthundubeza igciwane leCOVID-19 emizimbeni. UMnu. Luke Mathe uyesaba ukuyahlatshwa ijekiseni yokuvimba iCOVID-19.

UMnu. Adwel Dube ukusimo esifanayo.

Abokholo lweIslam bakhuthaza abantu eZimbabwe ukuba bahlatshwe amajekiseni okuvuselela amasotsha omzimba alakho ukulwisana legciwane leCOVID-19. USheik Ronold Mugayi wakoBulawayo uthi kuqakathekile ukuhlatshwa amajekiseni loba beqhuba uhlelo lweRamadan.

Ingcwethi kwezempilakahle zithi zikhathazekile ngokungaphumi ngobunengi kwabantu ukuyahlatshwa amajekiseni okuzivikela kumkhuhlane weCOVID-19. Eyinye yezingcwethi lezi, uDokotela Tinashe Gede, uthi kunengi okumele kwenziwe ukuze abantu bahlatshwe amajekiseni ngemfanelo.

UMongameli Emmerson Mnangagwa utshele abantu eKwekwe ngeviki ephelileyo esiyahlatshwa ijekiseni okwesibili ukuba kumele bahlatshwe ukuze bengathaphi igciwane leCOVID-19.

Okuhlangothi lwezempilakahle okhangelane lokuvimba ukumemetheka kwegciwane leCOVID-19, uDokotela Agnes Mahomva, kaphendulanga imibuzo esimthumezele yona mayelana lokwenzakala kuhlelo lokuhlatshwa kwabantu amajekiseni okuvimba umkhuhlane weCOVID-19. Uhulumende ufisa ukuthi kuhlatshwe abantu abayizigidi ezilitshumi eZimbabwe ukuze kuvinjwe kahle ukumemetheka kwegciwane leCoronavirus.

Uhlangothi lwezempilakahle luthi sokulabantu abafika phose inkulungwane ezingamatshumi amane – 38,064 asebehlolwe eZimbabwe kusukela ngoMbimbitho nyakenye batholakala bele COVID-19. Bedlula kancane inkulungwane ezingamatshumi amathathu lanhlanu – 35,101 asebephephe kumkhuhlane lo elizweni.

Emhlabeni wonke jikelele, isibhedlela seJohns Hopkins University sibika ukuthi sokulabantu abedlula izigidi ezilikhulu -146 million asebetholakale bele COVID-19 emhlabeni wonke jikelele, kwatshona abedlula izigidi ezintathu – 3,1 million.

Facebook Forum

XS
SM
MD
LG