amalinks wokungena

Breaking News

Bathwele Nzima Abathenga Impahla Kwamanye Amazwe Ngokuvalwa Kwemingcele


Emngceleni wakwele Botswana leleZimbabwe.

Abathenga bethengisa impahla kwamanye amazwe bafisa ukuba imingcele ivulwe njengoba kukhanya lisehla inani labatholakala belegciwane leCOVID-19 eZimbabwe kulez’insuku.

Kulabanye njalo abathi ukuvulwa kwemingcele kungamemethekisa igciwane leCOVID19 elizweni, kwele South Africa lamanye amazwe aduzane lele Zimbabwe.

Embikweni wabo abawethula nsukuzonke oveza isimo elizweni ngomkhuhlane weCOVID-19, abezempilakahle baveze ukuba kulabantu abangamatshumi amabili lantathu - 23 abatholakale belegciwane leCoronavirus ekutshoneni kwelanga izolo njalo akekho olahlekelwe ngumpefumulo.

Abalitshumi balabo bantu abatholakale belegciwane leli ngabantwana besikolo abafunda eMasvingo lakoBulawayo. Kungalesi sizatho-ke abanye abantu eZimbabwe besithi kasikho isizatho sokuba kuvalwe imingcele okungena lokuphuma uzulu, ikakhulu abathenga bethengisa impahla kwele South Africa, eBotswana lamanye amazwe.

Omunye wabahlutshwa yikuvalwa komngcwele welizwe nguNkosikazi Sindiso Mpofu, ophila ngokuthengisa impahla.

"Konke esikudingayo ekusebenzeni kuyabe kunzima ukuthi kutholakale. Mina njengomzali ozisebenzayo, hayi i-COVID ingibangele ukuhlupheka kakhulu empilweni yami ngoba imali engangiyigcinile, ngacina ngiyisebenzisa." UNkosikazi Nomalanga Khumalo wakoBulawayo uthi imingcele kumele ivulwe sonke isikhathi hatshi kulekhefu.

"Mina ngibona kungcono engavuli ama-border especially ngama holidays, yikho okumele avale khona but okwesinye isikhathi lesi, hayi, akukho right ngoba isimo seCOVID laso siyehlile, kuyakumele acabangele abantu, avule ama-borders then ngesikhathi sekuphithizela, abantu ma bephithizela laphana, kube yisona isikhathi abavala ngaso, ukuze abantu behlale bendawonye, bengahambahambi, kuyavikela ukuthi abantu bengayispredi leyo COVID ngoba bazobe bengahambahambi." Umsekeli kamphathintambo wezempilakahle, uDokotela John Mangwiro, uthi okwamanje kungeke kwakhulunywa kakhulu ngodaba lokuvulwa kwemingcele njengoba uhulumende efuna ukulondoloza impilo kazulu. Uthi liyamemetheka igciwane leCOVID-19 ngakho-ke kuvalwe imingcele ukwenzela ukuba ungamemetheki ngamandla umkhuhlane lo.

UDokotela Mangwiro uthi besaba ukuba kungaqhamuka ihlandla lesine lomkhuhlane weCOVID-19 okuthiwa ngeSilungu yi-4th wave.

"Saba legagasi lakuqala lelesibili, abantu bacabanga ukuthi usuhambile kodwa uyaphinde ubuye njalo. Sesisazi ukwenza kwawo, igagasi lingavele liqale kwenye indawo, lilakho ukusabalala lisiya kwamanye amazwe, yikho nje kuthiwa lubhubhane. Sesilindele ukuthi elizayo libuye ngoba lizobuya njalo njengohulumende kumele sihlale singalungiseleleyo sikhathi sonke."

EleZimbabwe lavala imingcele lisesaba ukuba lizamemetheka ngamandla igciwane leCOVID-19. Abezempilakahle babika ukuba umkhuhlane lo usubulele abantu abedlula inkulungwane ezine lengxenye – 4,699 kusukela ngoMbimbitho nyakenye.

Udaba Esilethulelwe NguMavis Gama
please wait

No media source currently available

0:00 0:04:22 0:00



Facebook Forum

XS
SM
MD
LG