amalinks wokungena

Breaking News

Iqembu leZimbabwe Cricket Libhuqa eleAfghanistan


Iqembu elimela ele Zimbabwe emdlalweni kakhilikithi linqobe ele Afghanistan ngama wickets alitshumi, emdlalweni wakuqala wohlobo lwe Test ofike emaphethelweni namhla. Lumdlalo uqhutshelwe kweleUnited Arab Emirates.

Ukaputeni weqembu laseZimbabwe uSean Williams udlale indima enkulu ekunqobeni kweqembu leli njengoba etshaye ama runs edlula ikhulu, okubizwa kuthiwa yi century ngabazi umdlalo kakhilikithi.

Ekhuluma ekupheleni komdlalo uWilliams uveze ukuthokoza okukhulu ngokunqoba kweqembu lakhe.

“Ukunqoba kumdlalo we test ngemva kwensuku ezimbili kuyinto enkulu kakhulu kithi ngoba siliqembu elisacathulayo elikhangelele ukuba lekusasa enhle.

Njengokutsho kwami ukunqoba ngemva kwensuku ezimbili kuyinto ejabulisayo kodwa kuzamele singathabi sedlulise amalawulo ngoba kusaselomunye umdlalo we test okumele siwudlale.

Ngalokho ke sizakuthi ukuhlaba ikhefu okwensuku ezimbili sibe sesibuyela ekuzilolongeni.”

Intathelizindaba yezemidlalo uDumi Dhlakama uthi kuyinto enhle ukubona uWilliams ekhokhela ngezenzo enkundleni.

“USean Williams udlale kuhle ngoba ungene ngesikhathi sekungani kulobunzima iqembu le Zimbabwe sesilahlekelwe ngabadlali abavulayo. Utshaye pole pole waze wafikisa ama runs angamatshumi amahlanu. Uqhubekele phambili elokhu ebuthelela ama runs aze edlula ikhulu. Lokhu kuyinto enhle ngoba abadlali be Zimbabwe bahlala besehluleka ukubuthelela ama runs aze afike alikhulu.

“Okujabulisayo yikuba yena njengo kaputeni weqembu nguye okhokhele iqembu laze lanqoba lidlala lingekho ngekhaya, okuyinto engavamanga ukwenziwa liqembu le Zimbabwe.”

UWilliams ubuthelele ama runs angu105 kuhlandla lakuqala elokuba iqembu le Zimbabwe litshaye ibhola njalo nguye okhethwe ukuba ngumdlali odlale kuhle okwedlula abanye.

Ngokwesithathu ukuba uWilliams abuthelele ama runs edlula ikhulu edlalela iqembu lesizwe njalo ngokwesibili engukaputeni.

Lumdlalo bekumele uphele ngemva kwensuku ezinhlanu njalo umdlalo wesibili owohlobo lwe test ozakuba phakathi kwamaqembu lawa uzadlalwa mhla zilitshumi kunyanga kaMbimbitho.

Ngemva kwalowo mdlalo lawamaqembu azadibana kumidlalo emithathu eyohlobo lweOne Day International.

Facebook Forum

XS
SM
MD
LG