Kulabanye abantu abamukela ngenjabulo iCyber Crime, Security and Data Protection Bill ekhangelelwe ukuthi izalawula indlela abantu okumele baziphathe ngayo ebulenjini bokuxhumana kanye lezomvikela.
Kodwa ingcwethi ezibona ngemithetho le zithi zilethemba lokuthi uhulumende akasoze akusebenzise lokhu kungaba ngumthetho ukuthi ancindezele ukwethulwa kwemibiko ngokukhululekileyo lelungelo labantu ebulenjini.
ICyber Crime, Security and Data Protection Bill yethulwa ngesikhathi kulokuhlukuluzwa okukhulu enkundleni zokuxhumana ezebulenjini ezifana laboFacebook, WhatsApp, Twitter lezinye, kungela mithetho ecacileyo yokujezisa izigangi kulezinkundla.
Isiphathamandla sikahulumende, uMnu. Mangaliso Ndlovu, ngoLwesibili wazise intathelizindaba ukuthi kungabunjwa umthetho lo uzasetshenziswa uzajezisa izigangi ezihlukuluza abanye ebulenjini bokuxhumana.
Ingcwethi emsebenzini ephathelane lezebulenjini, uMnu. Chris Musodza, uthi iCyber Security Bill iqakathekile ukuthi ibekhona kwele Zimbabwe.
“Kumele kube lemithetho elondoloza indlela abantu abaziphatha ngayo ebulenjini. Ebulenjini kulapho abantu asebekhulumisana khona behambisa imbiko etshiyeneyo ngakho-ke ubulembu yinkundla okumele ibe ilemithetho engavikela uzulu kwezinye ingozi.”
Umnumzana Brian Nhamo, isakhamuzi seHarare, ukhuthaze uhulumende ukuthi aqhube imikhankaso yokuchasisela uzulu okumunyethwe yiCyber Security Bill.
“Okwenzakalayo yikuthi kathesi iCyber Bill sesiyibonile, uhulumende usevumile ukuthi ibekhona kodwa uhulumende akenzanga umkhankaso oweneleyo ebantwini ngoba khathesi uzulu akakwazi ukuthi iCyber Bill le iyabe ikhangela obani njalo iyabe ikhangelani. Siyakhuthaza uhulumende aqhube imikhankaso eminengi ukuthi abantu bazwisise ukuthi iyenza ngokwani.”
