Annahstacia Ndlovu
Abantu abahlala eMatobo esabelweni seMatabeleleand South sebekhuthaze uhulumende ukuba abavumele baziphathele okwemvelo abalakho ukuze benelise ukuzithuthukisa kanye lokuzinakekela bona lemuli zabo.
Baveze lokhu emhlanganweni oqoqwe yinhlanganiso yeHabakkuk Trust eMaphisa, ibambisana leKhansili yeMatobo, inkokheli zomdabu labokhansila. Kuvunyelwane ukuthi imvelo yalesi siqininti engathuthukiswa akumelanga itshaphazwe ngabantu abasuka kwezinye izigaba okubangela ukuba basale bebhekane lobunzima ngemva kokutshabalala kwemvelo yabo bengatholi nzuzo.
Isiqinti seMatopo silamatshe aligugu afana legolide, izihlala, inyamazana, utshani, amanzi, inhlanzi kunye lomhlabathi ovundileyo kodwa kusezandleni zabantu abasuka kwezinye izigaba.
Induna uNyangazonke uVuyani Ndiweni uthe abanini besigaba akube yibo abaphatha imvelo yomnotho ukuze labo abasuka kwezinye izigaba befika baphiwa ngabakhona.
UKhansila Sikhulile Hlongwane kaWard 17 uthe uhlelo abaluphathe leHabakkuk Trust lubavule amehlo ekugcineni imvelo yabo lokuthi ibaphe inzuzo.
UMnu. Alexandra Phiri, uKhansila kaWard 10, uncome kakhulu impumela yomhlangano esithi isikhathi esinengi baswela imali yokuba lemihlangano ehlafuna ngemvelo.
Isakhamuzi seMatobo, uMnu. Robert Moyo, ugcizelele esithi uhulumende kahlele kahle umthetho wombuso wezabelo oweDevolution ukuze ubasebenzele.
UMfundisi uWhiteman Moyo olilunga lekhomithi yezabelo yeHabakkuk Trust usole inkokheli ethi abantu besigaba abalamandla okulawaula imvelo yabo.
Izigaba zonke zelizwe zikhala ngombuso wezabelo oweDevolution omunyethwe layisisekelo sombuso selizwe esalotshwa ngomnyaka ka2013, ukuze bazibuse kuthi inzuzo abayithola kwezemvelo abalazo bathuthukise izigaba zabo.
Kodwa uhulumende lomphathintambo wezemali bathi akulamali yokuqhuba uhlelo lombuso wezabelo kulandelwa isisekelo sombuso welizwe, osekutshiye uzulu waseMandebeleni ethuthukuthele ngalolu daba lwezemvelo.
