Kuliviki kuhlelo Woza Friday besileqembu le The Disciples of Jesus Christ Gospel Group lona eliledlalade elitsha elilegama elithi Umbonge UJehovah.
UHlengani lo Mpenduloyenkosi Sibanda ngumuntu lomfowabo ababumba iqembu le The Disciples of Jesus Christ Gospel Group.
Lezinsizwa ezidabuka esabelweni seNyathi zingene kwezomculo ngomnyaka ka 2015 njalo sezenelise ukukhipha amadlalade amabili awengoma zokholo.
“Sikhuphe idlalade lethu lakuqala ngomnyaka ka 2015 elithi UMose Wayibona kwathi lonyaka sikhiphe idlalade lethu elitsha elithiwa UMbonge UJehova njalo siyajabula ngosekelo esiluthola abantwini ngoba kutshengisa ukuba isizwe sakithi siyasisekela.”
Idlalade leli elithiwa Umbonge UJehovah licindezelwe eHouse of Rising Sound besebenza ndawonye lo Joe Maseko njalo lilengoma ezilitshumi ezigoqela yona okubizwa ngayo idlalade ethi Umbonge UJehovah.
Abaculi beseMaNdebeleni bahlala bekhala ngokuba ingoma zabo kazitshaywa emisakazweni kodwa iqembu le The Disciples of Jesus Christ lisebenzisana labanye abaculi abagoqela uCollen Moyo ukufikisa imisebenzi yabo kuzulu besebenzisa izikaniya.
“Abantu bayawusilela umculo wakithi yikho becina betshaya umculo we South Africa. Kuyabe sekungathi ngapha umculo kawukho yikho sathi ngcono siphume sihambe lawo umculo wethu ebantwini ukuze kunanzeleleke ukuba hayi laseMaNdebeleni ukhona umculo ojabulisa abantu.’
Abaculi laba kabathandanga ukutsho ukuba ngosuku olulodwa bathola imali engakanani ngokuthengisa ingoma zabo ezitaladeni kodwa bathi kuyabaphilisa lezimuli zabo njalo bazaqhubekela phambili ngoba kuyiyo kuphela indlela eyokuba imisebenzi yabo yaziwe nguzulu.