Ucwaningo olusanda kwenziwa yinhlanganiso yeZimbabwe Council of Churches luveza ukuba amabandla ezokholo lweSiKhristu aphambaniswe kakhulu ngumkhuhlane weCOVID-19 kusukela nyakenye.
Omunye wabenze uphenyo lolu njalo ongene umhlangano namuhla wokwethula impumela yalo, uMfundisi Kenneth Mtata, uthi kunengi kakhulu okuphambaniswe ngumkhuhlane weCOVID-19.
"Sabona ukuthi konke lokhu kwaphazamisa ibandla kakhulu, ngoba abantu abeza ebandleni labo baphazanyiswa ngama Lockdown lawa ngendaba yeCOVID-19 kwaphazamisa inotho yabo, kwaphazamisa ama-families abo. So, ama-challenges wonke lawa aphuma kuCOVID-19 ale direct le indirect impact ebandleni.”
Lokhu kusekelwe nguuMfundisi Thandeko Zinti Mnkandla.
"Ngoba abantu bahlala isikhathi eside bengayi ezinkonzweni, besesabela khona ukuthi kungamemetheka njengoba nje ama-Church engaba yilokhu okuthiwa yi super spreader. Lokhu kwenza kwaphambaniseka izinto ezinengi, okokuqala, abantu balahlekelwa yibudlelwano labazalwane, kwenza labo abalokholo olungaqinanga babuyela emuva, kwathi leminikelo yendleko zokubamba amabandla atshiyeneyo, zehla kakhulu ngobana abantu babengasabuyi ezinkonzweni. Njalo nje kanti lokholo lwabanye lwaphola lona lumele luhlale luvutha."
UMfundisi Useni Sibanda, okunhlanganiso yeZimbabwe Christian Alliance, uthi les’isikhathi sobhubhane sikuveze sobala ukuba ibandla leSiKristu lilomsebenzi omkhulu wokuhola abazalwane kwezenkolo njalo lilokhe lisalisawudo lelizwe lomhlaba.
"Ibandla lithole isikhathi sokuthi likhankase, lincedise uzulu ukuthi ananzelele lumkhuhlane weCOVID-19. Kube ngumsebezni omkhulu kakhulu ngoba sibonile amabandla eletha imibheda, eletha izingubo, encedisa ngemithi, encedisa ngezinto ezithize ezehlukeneyo, zingena endaweni zezibhedlela, zingena lapho kade kudingakala khona, abantu bekhathazekile kodwa ibandla libe khona, labancedisa. Ngakho iCOVID itshengisele ukuthi ibandla lokhe lingusuwuti wabantu, lokhe lingusawuti welizwe lethu. "
Ekuqhamukeni kwalolubhubhane nyakenye, uhulumende wahle wamisa abezinkolo ukuba bebuthane emabandleni kusenzelwa ukuvimba ukumemetheka kwegciwane leCOVID-19.