Abantu abanengi lokhu bengenelisi ukuya ezibhedlela loba odokotela abanye sebebuyele emsebenzini.
Lumsakazo wethekelele isibhedlela seParirenyatwa ngeSonto ukuyahlolisisa ukuthi isimo selokhu odokotela babuyelayo emsebenzini ngemva kokukhalala umsebenzi ngoMpandula nyakenye bekhonona ngeholo elinganeli indleko zabo.
Osakhulayo uTapiwa Musonza uthi lanxa emukelwe kahle esibhedlela akalayo imali yokuhlawulela okunye kwalokho kwenziwe emzimbeni wakhe.
UMnu. Kudzai Mashope, obesesibhedlela lesi lapho akade esethekelela isihlobo sakhe esilemvukuzane yomlomo wesibeletho, uthi lokhu kukhanya engani odokotela labongi bazithathela isikhathi sabo ukuthi belaphe izigulane.
Ingcwethi kwezokulondolozwa kwabantu, uMnu. Thamsanqa Mangena, uthi kuqakathekile ukuba uhulumende athuthukise ezempilakahle ngoba akuncedi ukuba labodokotela kodwa abantu besehluleka uhuhlawula imali efunakalayo.
Odokotela abanengi babuyele emsebenzini kulandela ukuthola imali abayiphiwe ngusomabhizimusi uMnu. Strive Masiyiwa ozabanika okutshiyeneyo. Bazathola njalo iholo likahulumende.
Umuntu odinga uncedo esibhedlela seParirenyatwa uhlawula amakhulu amabili amadola eZimbabwe – 200 bond - ukuze athole ugwalo lwesibhedlela njalo uhlawula amakhulu ayisithupha – 600 Bond nxa kumele alaliswe esibhedlela.
Kasenelisanga ukukhuluma labodokotela, iziphathamandla zesibhedlela lezi kanye loDokotela Paulinus Sikosana, obona ngokuqhatshwa kwabodokotela, ngokubuyela kwabo emsebenzini.
