Odokotela abaxotshwa umsebenzi, baphiwa nguMongameli Emmerson Mnangagwa insuku ezimbili ukuthi babuyele emsebenzini, batshaya phansi ngenduku besithi akukalungiswa okubahluphayo.
UDokotela Mthabisi Bhebhe, okunhlanganiso yabodokotela abathuthukayo eyeZimbabwe Hospital Doctors Association, uthi lokhu bexoxisana leziphathamandla zikahulumende kanye labafundisi abacele ukuthi uhulumende abaxolele.
Uthi kusakude phambili ukuthi babuyele emsebenzini ngoba uhulumende kakhuphulanga iholo labo njalo kathenganga imitshina lemithi efunakala ezibhedlela zelizwe.
UDokotela Paulinus Sikosana, umgcinisihlalo wohlangothi oluqhatsha odokotela eyeHealth Service Board, uthi bamelele ukubona ukuthi odokotela bazabuyela emsebenzini ngoMvulo kumbe hatshi.
Odokotela abasathuthukayo sebelenyanga ezintathu bekhalala umsebenzi besithi bafuna iholo uhulumende akhuphule iholo labo.
Umthethwandaba weLabor Court wethula isinqumo sokuthi ukukhalala kwabo umsebenzi akukho emthethweni.
