amalinks wokungena

Breaking News

Abalwa Impi Yenkululeko Bathi Akulabantu eZimbabwe Abathunjwa Ngabadlelana Lohulumende


UMnu. Douglas Mahiya wenhlanganiso yeZimbabwe National Liberation War Veterans Association.

Abenhlanganiso yabalwa impi yenkululeko eyeZimbabwe National Liberation War Veterans’ Association (ZNLWVA) bathi ngamanga ukuthi kuthunjwa abasekeli bebandla eliphikisayo kanye labalwela ilungelo loluntu.

Bathi lokhu kwenzelwa ukuthi kungcoliswe uhulumende kaMongameli Emmerson Mnangagwa. Lokhu kugcizelelwe njalo ngabenhlanganiso ye Zimbabwe Citizens Forum esekela uhulumende.

Unobhala weZNLWVA, uMnu. Douglas Mahiya, uthi imibiko lemifanekiso yalabo abathi bathunjwa batshiywa belimele kayisiyo yeqiniso kodwa yindlela yebandla eliphikisayo eyokungcolisa uhulumende kaMnangagwa.

Loba kunjalo kubikwa ukuthi liyaqonga inani labantu abasekela ibandla leMDC elikhokhelwa nguMnu. Nelson Chamisa abalokhu bethunjwa ngabacatshangelwa ukuthi ngamapholisa ensitha.

UMahiya uthi nxa ukuthunjwa kwabantu kuliqiniso kumele kuvezwe sobala njalo kuvela lasemapholiseni ayiwo alomlandu wokucubungula izehlakalo lezi.

“Akusilo qiniso angizake ngizwe ngokuthunjwa kwabantu, yiwo amanga aluhlaza la. Angizake ngikuzwe lokhu nxa kukhona okunjalo okwenzakalayo kumele sikuzwe kuvela emapholiseni. Kodwa lokhu sikuzwa kuvela kubandla eliphikisayo.”

UMahiya uqhubeke esithi konke lokhu kwenziwa ngenhloso yokutshotshozela uzulu ukuthi atshengisele emigwaqweni ukuze iMDC igenqule uhulumende kaMnangagwa.

“Akula sizatho sokuthatha amandla kuhulumende ofuna ukuthuthukisa inotho ngomnyaka ka2030. Akula sizatho sokufuna ukuthatha ngamandla lawo mandla. Lokhu kwenzakala ngoba abeMelika labe Bhilitani bayakwazi ukuthi nxa intuthuko le ingagcwaliseka bayabe sebenqotshiwe. So, siyaqhubeka ngokuvikela lesis’izwe njengesakwenzayo ngesikhathi sempi yenkululeyo.”

Lokhu kugcizelelwe ngumkhokheli wenhlanganiso ye imbabwe Citizens Forum, uMnu. Taurai Kandishaya, othe amazwe angentshonalanga anikeza iMDC imali yokuqoqa inhlelo zokudunga ukuthula ezinjengokutshengisela okulodlakela elizweni okuyikho osekudala ukuba osomabhizimusi bengabi lesifiso sokutshala imali eZimbabwe.

“Kumele sizwisise ukuthi kulabasihlaselayo njengesizwe. Akulani loChamisa. Lokhu kubhekane lathi sonke esifuna imisebenzi. Siswela imisebenzi ngoba akula muntu obuya lemali phandle yokusungula amabhizimusi. Inkohlakalo ayisiyo exotsha amabhizimusi kuleli lizwe kodwa ukutshengisela lokhu okubhidliza impahla zabantu. Kumele sikulungisise lokhu.”

Kodwa lokhu kusolwe zingcwethi ezicubungula ezombusazwe ezithe imbiko enje akumelanga izwakale ivela kunkokheli yalabo abalwela ukukhulula leli lizwe.

Omunye wengcwethi lezi, uMnu. Mlungisi Maphosa, uthe ukuthunjwa kwabantu kuveza isandla sikaMnangagwa ekuthunjweni kwabantu kusukela ilizwe lithatha uzibuse.

“Okutshiwo ngumnumzana uMahiya yindaba edanisayo kakhulu ngoba nxa sikhangele abantu abasuka besiyalwela iZimbabwe babelwela ukuthi abantu beZimbabwe bekhululeke kodwa nxa sesinanzelela ukuthi amaWar Vets yiwo asengabahlukuluzi babantu yikuswelakala kwenhlanhla ngoba akungeke kwenzakale ukubana abantu behlukuluzwe uhulumende engenzi lutho.”

Facebook Forum

XS
SM
MD
LG