UMongameli Emmerson Mngangagwa, usenxuse inkokheli zamabandla ezombusazwe, inkokheli zenkonzo kanye labenhlanganiso ezimela amalungelo oluntu ukuthi bakhulumisane kutholakale indlela zokuqeda indubo ezibhekane lelizwe Zimbabwe ezivimba intuthuko yomnotho welizwe wona okusimo esibi okwamagama.
UMnangagwa uphindele ekhaya ngoMvulo ngesiphangiphangi esebone ukuba isimo lokhu siqhubeka simi manzonzo elizweni ngesikhathi esethekelela amazwe ambalwa kuzwekazi leAfrica.
Ebhala enkundleni yokukhulumisana eyebulenjini kuTwitter, uMnangagwa uxwayise inkokheli zamabandla atshiyeneyo, ezenhlanganiso ezizimeleyo labanye ukuthi basebenzelane lohulumende wakhe ukwenzela ukuthi kuthuthukiswa ilizwe leZimbabwe.
Lokhu kuza ngemva kokuba kube lodlakela emadolobheni amakhulu elizweni kulandela ukukhuphulwa kwentengo yamafutha ezimota nguhulumende kaMnangagwa.
Abanye abantu bafile kwathi abanye balimala okumangalisayo kulandela udlakela olwaqhamuka uMnangagwa esanda kubika ukuthi sebekhuphule intengo yamafutha epethulo.
kokukhwezwa kwentengo yamafutha ezimota okwaziswe nguye uMnangagwa engakasukumi elibhekise emazweni watshiya elizweni sokuqhamuke ingxabanxoza.
UMnu. Mabutho Moyo, ilunga lohlangothi lwabatsha kubandla leZANU PF olwe Youth League, wamukele ngezandla zombili inkuthazo kaMnangagwa.
IStudio 7 yehlulekile ukuthola impendulo kule inkuthazo kwabebandla eliphikisayo ele MDC, lalobanje bebethembisile ukwethula umbiko ojulileyo ngodaba lolu.
UMnu. Nelson Chamisa, umkhokheli weMDC, laye ebhala enkundleni yeTwitter ngoLwesibili, uthe kulusizi ukuthi kuthethe ukubulawa kwabantu lokubhidlizwa kwempahla elizweni ukuze uMnangagwa ananzelele ukuthi kumele akhulumisane labanye abakwezombusazwe kanye lenkokheli zokholo.
Utsho lokhu elandula ukuthi uMnangagwa akazange afune ukulalela lowo mbono ngemva kokuba “entshontshe” ukhetho osokuyinto aseyinanzelele khathesi ngoba ilizwe selidabukile.
Lokhu kugcizelelwe lilunga le MDC elimele iMatebeleland North edale le Senate, uNkosikazi Phyllis Ndlovu, othi uMnangagwa kathembeki njengoba uhulumende wakhe uqhubekela phambili ebopha amalunga amabandla aphikisayo ayiwo athi ufuna ukuxoxisana lawo.
“Hayi asimthembi, sakhuluma laye sathi kube lokukhulumisana kudala wayala. Wakukhipha kumaphephandaba ukuthi akakhulumisani lezinye inhlanganiso kanye lebandla leMDC, so lokhu osokusenzakala njalo sesitshontshelwa ama MPs ethu, esiyatshaywa, evalelwa, asivumelani lakho njalo asimthembi futhi, kumele ukuthi thina sivumelane laye, sibe lokukhulumisana sodwa ukuthi singathini ngakho hatshi ukuthi yena asitshele ukuthi senzeni ngoba wehluleka kudala khathesi sekungokwesibili ukufa kwabantu, abantu labana abasoze baphenduke, khathesi siyatshonsthelwa ama MPs, siyabulalelwa abantwana”
Kodwa uMnangagwa uthi kulusizi ukuthi amasotsha aziphathe ngendlela engalunganga ngeviki edluleyo. Uthe kuzamele kuhlolisiswe abephule umthetho ngokutshaya lokubulala abantu besithi basemsebenzini wezomvikela.
Inengi labantu lithi inkulumo kaMnangagwa kumele ingapheleli emlonyeni.
Abezinkonzo bona bathi kuyadingeka ukuthi inkokheli zelizwe zihlale phansi zicebesane ngokumele kwenziwe ukwenzela ukuhlenga ilizwe enkingeni elibhekane lazo.
Kusenjalo, umkhokheli webandla leMDC uMnu. Nelson Chamisa uthi nxa umongameli Emmerson Mnangagwa eqinisile ngakutshoyo, kufanele aqale akhulule ababotshiweyo kunsukwana ezedluleyo ngoba kwenziwe ngaphandle komthetho.
UMnu. Nkululeko Sibanda, isikhulumeli sikaMnu. Chamisa usichasisela okunengi ngaloludaba, kanye lezinye izikhalazo zikaMnu. Chamisa.