amalinks wokungena

Breaking News

Inkokheli Zomdabu Zifuna Kulungiswe Umbhuqazwe weGukurahundi


Bagebha amathambo abantu ababulawa yiGukurahundi eDete esabelweni seMatabeleland North.

Induna ezidabuka eMatabeleland leNkabazwe zitshela uMongameli Emmerson Mnangagwa ukuthi zihlutshwa ludaba lombhuqazwe weGukurahundi okumele lulungiswe ukwenzela ukuthi kube lokukhumisana umlotha phakathi kukahulumende webandla leZanu PF lozulu eMatabeleland kanye leNkabazwe okwabulawa khona abantu abafika inkulungwane ezingamatshumi amabili – 20,000 kusukela ngomnyaka ka1983 kusiyafika umnyaka ka1987.

UMnangagwa wethule lokhu namuhla esanda kwenza umhlangano lenkokheli zomdabu ezeNkabazwe leMatabeleland okukhulunywe ngodaba lolu lokunye okutshiyeneyo.

Induna zinike uMnangagwa ugwalo oluveza ukuthukuthela kwabantu ezabelweni lezi. Utshele intathelizindaba ukuthi belumqoka udaba lweGukurahundi emhlanganweni wabo abawenzele eState House.

"Ngize lapha koBulawayo kulandela ukunxuswa zinkokheli zomdabu zemaNdebeleni, sengenelisile ukulalela inhlupho ababhekane lazo lapho abasuka khona kubikwa zinkokheli. Olunye udaba ludaba lombhuqazwe weGukurahundi libeke indlela ezimqoka zokulungisa loludaba kanye lokuthi umbhuqazwe waphambanisa indawo abazikhokhelayo njalo labo kuyabahlupha ngakho njengohulumende inkokheli zomdabu kumele zibekhona ekuqondiseni loludaba kumele lubeleziqonsiso ezimqoka ngaloludubo,''

Ugcizelele esithi kukhona okunye okumqoka abakukhulumileyo lakho bazakulungisa.

“Kukhona njalo okunye okumqoka esithe sakhuluma ngakho lenkokheli zomdabu okubalisa imiggwaqo, amanzi, ezokudla, ezemfundo kunye lezempilakahle konke lokhu sizakulungisa.''

Kubikwa ukuthi okunye okukhulunywe emhlanganweni lo zimpahla zebandla leZAPU ezathathwa nguhulumende ngodlame, ubuyanga, umbuso wezabelo, ukudla lomhlabathi, ezemfundo, ulimi lamasiko, uhlupho lwamanzi, imiqwaqo, ezemisakazo lomabonakude, ezempilakahle, amandla kagesti, inhlupho zezifuyo kanye lokulondolozwa kwendawo ezizilayo.

Umsekeli kamongameli wezinduna, uMtshana Khumalo, ubonge ukuza kuka Mongameli Mnangagwa eveza obala ukuba njengeZinduna babanjwe amahetshe.

“Ngiyabona ukuza kwakho lobanje ekuzeni kwethu kuthange besingazi ukuthi iagenda yiphi, kodwa njengenkokheli sihlalephansi savumelana ukuthi sihlafune indaba ezimqoka esesikwethulelezona loba besingaphathekanga ekuqoqeni lumhlangano."

Akwaziwa ukuthi okwenzakale namuhla eState House kungaguqula kumbe hatshi ubudlelwano buka Mnangagwa labantu abahlala eNkabazwe leMatabeleland. Isikhulumeli seZAPU, uMnu. lphithule Maphosa, uthi kaboni lutho oluzalungiswa nguhulumende kukho konke okubekwe zinduna namuhla.

“Asiboni lutho oluzaphuma ngoba uma sikhangela imbali kaMnangagwa wasithembisa ngesikhathi sikhupha uMugabe embusweni ukuba uzasibuyisela impahla zethu abazithumbayo lakho konke kodwa kuze kubelamuhla akakasiphi lutho sesileminyaka emibili kwenzakele. Ukewahlala lamaCSO akula asethe wakugcwalisa, lalapho eseDavos wathembisa ukulungisa udaba lombhuqazwe weGukurahundi kodwa akulanto aseyenzile udlala ngemali yesizwe kanye lesikhathi sesizwe. "

UMnu. Mbuso Fuzwayo, umabhalane jikelele wenhlanganiso elwela amalungelo oluntu Ibhetshu LikaZulu, uvumelana loMaphosa.

“Kuhle ukuthi uhlangane labo kodwa okuhluphayo kusukela ngo2017-2018 eseDavos wathembisa ukuthi udaba lweGukurahundi uzalulungisa lezinduna, kunyanga ezintathu ezidlule uhlangane lamaCSO akoBulawayo kodwa kakalungisi lutho. Lekhomishini yokukhumisana umlotha kakayiphi mali yokulungisa udaba lombhuqazwe njalo ekulungiseni udaba lombhuqazwe. Ulokhe engakaphi ibandla leZAPU impahla yabo uyabe engenzanga lutho, sekudlule iminyaka emibili lokhe wabathembisa ukubapha akuthumbayo kuze kube lalamuhla."

Ngokwakuqala ukuba uMnangagwa akhulumisane lezinduna selokhu wangena esikhundleni sikamongameli kulandela ukususwa kowayengumongameli, uMnu. Robert Mugabe, owetheswa icala lokulolonga iGukurahundi ngesikhathi elwisana lebandla leZapu elalikhokhelwa ngumuyi uJoshua Mqabuka Nkomo. UMugabe wayecabangela ukuthi uNkomo wayefuna ukumsusa esikhundleni ngodlame.

Udaba Esilethulelwe NguAnnastacia Ndlovu
please wait

No media source currently available

0:00 0:05:47 0:00

Facebook Forum

XS
SM
MD
LG