amalinks wokungena

Breaking News

IZIMSEC Yengezelela Isikhathi Sokuhlawula Imali Yokuloba Imihloliso


Abazali kanye labafundi bemukele ngenjabulo isinqumo esithethwe luhlangothi olubona ngemihloliso olweZimbabwe Schools Examinations Council (ZIMSEC) sokwengezelela isikhathi sokuhlawula indleko yokubhala imihloliso yalonyaka bethi kubanika ithuba lokuqoqa imali evele ingatholakali lula ngalez’izikhathi zobunzima bokumelana leCoronavirus.

AbeZIMSEC bethule umbiko wokwazisa abaphathisikolo elizweni lonke ukuthi sokwengezelelwe insuku zokuhlawulela ukubhala imihloliso yeOrdinary level leyeAdvanced Level yalonyaka.

Umbiko lo ovele kumqondisi weZIMSEC, uMnu. Nembaware, uthi ukuhlawulela ukuloba imihloliso yalonyaka kuzamiswa ekuqaleni kwenyanga ezayo mhlaka 2 Mfumfu njalo abafundi bonke abakhangelele ukubhala lonyaka kumele baziswe.

Umgcinisihlalo weZIMSE, uMnu. Eddie Mwenje, utshele abephephandaba leChronicle ukuba bathethe lesi sinqumo ukuze banikeze abafundi ababhekane lobunzima obudalwe yiziqondiso zohlelo lweCOVID-19 lockdown, ithuba lokuqoqa imali yokubhadalela indleko zokubhala imihlolise le.

Uthe ukubhadalela imihloliso kuzaqala mhla kuvulwa izikolo zika hulumende mhlaka 28 Mpandula kuze kuyekuma mhlaka 2 Mfumfu.

Uveze njalo ukuthi uhlangothi lwakhe soluqedile ukuhlela amaphepha emihloliso ezabhalwa ngabafundi abaphutsha izifundo zikaGrade 7. Wengeze ethi yonke le, yimizamo kahulumende weZimbabwe yokuthi wonke umuntu athole ithuba elifanayo lokulungiselela ukubhala imihloliso yalonyaka engabe iphanjaniswe yikuqhamuka kweCOVID-19.

Inhlawulo yokuloba imihloliso yeOrdinary Level ngamakhulu phose amabili - ZWL190.00 kuthi eyokuloba imihloliso yeAdvanced Level ngamakhulu amathathu lengxenye - ZWL350.00.

Lanxa abazali labafundi besamukele ngenjabulo les’isinqumo, bathi kodwa kulobunzima obukhona ngoba bengafundanga okuzwayo lonyaka abafundi.

Umbalisi ofundisa esikolo esisesiqintini seNkayi esabelweni seMatabeleland North, uNkosikazi Ethel Tshuma, uthi abantwana abafundanga lutho ngakho ukubhala imihloliso yikwenza nje.

“Lokhu akukuhlanga kakhulu, akuphumi kuhle kithi ababalisi kambe singathi sifundise three months kuphela. Abantwana laba bazabhalani kumbe kuyafana lo2008 lapha abantwana abangazange bafunde kuhle ngenxa yendlala lokunye akwakusenzakala. Aluba nga kuyenza nga bayamisa ukubhala kwabantwana laba bayefunda ngendlela okumele bafunde ngayo sibafundise ngendlela esafundiswa ngayo lathi emakolitshini.”

Unkosikazi Sifiso Ndlovu ongumzali olomtwana obhala lonyaka laye ugcizelela kumbono othi kuzaba nzima ukuthi abantwana babhale ngoba bengafundanga.

Omunye njalo umzali olomntwana obhala lonyaka, uNkosikazi Nomsa Ntini, uthi kumele imihloliso idluliselwe phambili.

Facebook Forum

XS
SM
MD
LG