amalinks wokungena

Abaqeqetshi beHighlanders Royals Bathi Bazimisele Ukudla Wonke Amaqembu

  • Joseph Njanji

UTolence Tazira loEvans Netha

Inkokheli zeqembu lomdlalo wenguqu yabesifazane, ele Highlanders Royals, zithembisa ukuba lonyaka leliqembu lizabe lisidla ubhedu kusigaba se Zifa Southern Region Division One Women Soccer League.

Iqembu le Highlanders Royals livuselelwe nyakenye ngomnyaka ka 2016 ngemva kokuba libhulube ngomnyaka ka 2005 imbangela kuyikusilela kwemali. Nyakenye leliqembu liqale imidlalo yalo kusigaba se Zifa Southern Region Division One Women Soccer League lingumthatshuzwa lidliwa lihlohlwe kanengi kabi.

Ophethe isikhundla sokuba ngumgcinisihlalo weqembu le Highlanders Royals uSibekiwe Ndlovu uthi lonyaka bathethe amanyathelo okuba leliqembu lizadlale ngcono kulanyakenye.

“Nyakenye siqale kubi kakhulu sidliwa ngamanani amakhulu kodwa sithe sesifike phakathi laphakathi kwesizini lathi saqala ukunqoba. Lonyaka lathi bazezwa ngathi angiboni ukuthi singadliwa ngemiklomelo edlula emine. Sidinge lomqeqetshi ololwazi sathenga lempahla eyokusebenzisa nxa sizilolonga.”

Umqeqetshi omutsha weqembu le Highlanders Royals ngu Evans Netha yena obeqeqetsha iqembu le Hearts of Oak lona eliqede imidlalo yalo likundawo yesibili engalaneni yemiklomelo kusigaba se Zifa Southern Region Division One Women Soccer League nyakenye.

“Sisazama ukuthi sakhe iqembu leli elikhulu ele Highlanders njalo ngiyathokoza ngoba abadlali bemukela kuhle konke esizama ukubafundisa khona. Ngiyathembisa ukuba lonyaka iqembu leli lizabe lehlukile kakhulu kulanyakenye njalo amaqembu kuzamele alimuke.”

Umqeqetshi uNetha uke waqeqetsha amaqembu agoqela ele Cowdray Park lalo elidlala ku Zifa Southern Region Division One Women Soccer League kodwa engakasebenzi lamaqembu abesifazane ubeqeqetsha iqembu labafana ele Luveve Juniors.

Ukaputeni weqembu le Highlanders Royals uTolence Tazira uthi yena lonyaka iqembu leli liqinile okokuthi kuzamele lidlale ngcono kulanyakenye.

“Njengoba silomqeqetshi omutsha kukhanya abantu bazimisele ukufunda njalo sekulomehluko ekudlaleni kwethu. Umnyaka usiyaphela ngibona angani yonke into iyabe isiqoqeke kahle njalo engalaneni yemiklomelo singaqeda sikhonaphana endaweni yesithathu.”

Nyakenye iqembu le Highlanders Royals liphutshe imidlalo lisendaweni yesithathu nxa usuka ngaphansi kwengalane.

Iqembu le Inline Academy yilo eliphakamise isicoco ngemva kokuphutsha imidlalo lihlezi phezu kwengalane yemiklomelo kuthi ngemva kwalo bekuleqembu le Hearts of Oak kulandele ele Borrow Jets, New Orleans, Black Boots, Magwegwe High, ZRP Byo, Hwange Queens, Street Set, Highlanders, Cowdray Park kuthi ele Sobukhazi yilo eliphutshe imidlalo yalo lisemsileni wengalane.

Facebook Forum

XS
SM
MD
LG