amalinks wokungena

Breaking News

UMfundisi Omkhulu weRoma Obhubhileyo Unikwa Isicoco Seqhawe leZimbabwe


Umfundisi omkhulu weRoma, uFather Emmanuel Ribeiro. (Courtesy Photo: Kudzai Samaita)

Umfundisi omkhulu weRoma, uFather Emmanuel Ribeiro, obhubhe ngoLwesine, usenikwe isicoco seqhawe lelizwe leZimbabwe.

Lokhu kwethulwe yiziphathamandla zika hulumende kaMongameli Emmerson Mangagwa, owancedwa nguFather Ribeiro ngesikhathi sempi yenkululeko ukuba engalengiswa ngabamhlophe kulandela ukudubuka kwebhomba esilindweni sezitimela eFort Victoria.

Iziphathamandla zikahulumende kanye lezizalwane zeZimbabwe bayakhala ngokutshona kuka Father Ribeiro, obhubhele esibhedlela seSt. Anne eHarare.

Bathi minengi imisebenzi kaRibeiro emenza abengumuntu wabantu. Igoqela ukulwela amalungelo kazulu, ukuphathisa abantu ngesikhathi sempi yenkululeko, ukuloba ingwalo lengoma yelizwe – inational anthem lokunye.

Omunye wabancoma imisebenzi yakhe yintathelizindaba, uTafadzwa Chigandiwa.

UFather Ribeiro loMnu. Kudzai Samaita olilunga leRoma. (Photo/Credit: Kudzai Samaita)
UFather Ribeiro loMnu. Kudzai Samaita olilunga leRoma. (Photo/Credit: Kudzai Samaita)

“Thina njengama Katolika sithi ukubhubha kuka Father Rebeiro kusiphathe kabuhlungu sibili ngoba ubengumuntu okade eziphethe kahle. Ukuze akwanise ukwenelisa iminyaka le engu-86, kutshengisela ukuthi ngumuntu kade eziphethe kahle empilweni yakhe njalo ubengumuntu okade ehambisa ilizwi lenkosi, ebantwini bonke. Singakhangela i-history yakhe sizabona ukuthi ulesandla njalo ulokunceda empilweni kumbe ekuthuthukeni kweZimbabwe. So, sithi akalale ngokuthula uFather Ribeiro, sizabe simkhumbula lanini, lanini.

Omunye njalo nguMnu. Victor Dube, ohlala eHarare.

“Ngilokudana okukhulu ngokubhubha kukaFather Ribeiro. UFather Ribeiro mina ngimazi personally, ngake ngaba lesikhathi, ngixoxa laye. Ukuxoxa kwami laye, kwakusemtshadweni yena enguye owayetshadisa abantu ababetshada njalo sekuphelile konke okwakusenziwa emtshadweni, mina ngakhethwa ukuthi ngikwejise laye, ngasengikwejisa laye okwesikhathi sibili, sixoxa sibili sonke, engumuntu okhululekileyo, wayengathi ngumuntu ohlala ekubona. Njalo ngesikhathi soneso ngixoxa laye, kwabakhona ukuthi, khona, khona, ngasengiba ngumuntu othi ngingahlangana laye, ayengazi njalo abe lesikhathi lami sokuthi ngikhulume laye. ”

UDube uthi uFather Ribeiro wayethanda abantu.

“Wayengumuntu olula okokuthi wena nxa ufuna ukukhuluma ulutho laye wayekunika isikhathi sokuthi ukhulume laye njalo engumuntu lowana owayezama sibili ukuthi akuncede kuzinto oyabe ufuna ukuthi uncedwe ngazo. Ezikhathini ezinengi, ekuphileni kwami ngingumuntu ophila letshukela, laye wayengumuntu ophila letshukela njalo sasixoxa, siphanana amacebo, sisazisana ezinye izinto ezempilakahle. ”

Ingcwethi kwezombusazwe, uMnu. Tjenesai Ntungakwa, uvumelana lemicabango kaDube.

“Singakhangela lakho, oNdabaningi bangena ku-politics bengabafundisi, oMuzorewa, abantu abanjalo, oBanana, uBanana laye wayengu-Reverend, bangena labo ku-politics bengabantu abanjalo. Kodwa amaKhiwa, ikakhulu ama-Catholics, yibo abamisa kakhulu ngoba izikolo zabo, zazivula abantu ingqondo. Singakhangela oMugabe bafundiswa ngama-Catholics, yikho babevula ingqondo abantu. OColonel Tshinga Dube, bafunda ezikolweni ezinje ngabo- Solous, ezazingezamaSabatha. Kodwa ke lezo zikolo lazo, amatitshala amanye ayenika umbono, esingathi ngumbono weNationalism."

UNtungakwa ugcizelele esithi wayengafani labanye abakhokhela ezokholo lweSiKhristu.

“Kodwa singakhangela iZimbabwe yanamhlanje, kungaba nzimanyanyana ukuthi iChurch ingene ekwakheni isizwe, ngenxa yani, sileZimbabwe Council of Churches sile Catholic Bishops Conferences, lento ezinjalo kodwa-ke abantu laba kabamanyani. Okwakhathesi abantu ababengani bayakhuluma, singakhangela ngesikhathi seGukurahundi, iCatholic Commission for Justice and Peace, yiyo eyazama ukuletha udaba lolu. So, okwakhathesi, ukubona kwami, kunzima ukuthi abama-Church bangene wezombusazwe. Ngenxa yani, kayikho platform elabantu abalokhe bebambene njengakudala."

Akwaziwa ukuba uFather Riberio uzangcwatshwa nini. Wavikela ukuba uMnu. Emmerson Mnangagwa engalengiswa kulandela ukwetheswa kwakhe icala lokubhomba esilindweni sesitimela eFort Victoria.

Abantu Bancoma Imisebenzi Kamuyi uFather Riberio weRoma
please wait

No media source currently available

0:00 0:04:19 0:00


Facebook Forum

XS
SM
MD
LG