Iqembu lomdlalo wenguqu ele FC Platinum kuzamele lenze izimanga ukuze ledlulele kusigaba esilandelayo kumncintiswano we Total CAF Champions League njengoba liqhubekela phambili liqhuba nzima kumidlalo yezibaya.
Iqembu le FC Platinum yilo elijeke amanye lisemsileni wengalane eyesibaya sika Group B lilomklomelo owodwa ngemva kwemidlalo emithathu eseliyidlale kusigaba sezibaya kumncintiswano weTotal CAF Champions League.
Abafana be FC Platinum batshaywe nge 1 ka nya liqembu le Horoya Athletic Club elase Guinea ngoMgqibelo okuyimpumela etsho ukuba amathuba alo okudlulela kusigaba esilandelayo asefiphele kakhulu njengoba kumidlalo emithathu elisele layo, emibili yakhona lizabe lingekho ngekhaya.
Umqeqetshi weqembu le FC Platinum uNorman Mapeza utshele intathelizindaba ekupheleni komdlalo ukuba abasoze belahle imbeleko ngokufelwa.
“Umthwalo wethu awusekho lula kodwa ngombono wami njengomqeqetshi sesifunde okunengi njengeqembu njalo okumele sikwenze yikuba siqhubekele phambili sisebenza ngamandla sibone ukuthi yikuyini okuzakwenzakala kumidlalo yethu elandelayo.”
Iqembu le FC Platinum lizavakatshela ele Horoya Athletic Club khonale kwele Guinea emdlalweni walo olandelayo mhla zilitshumi lambili kuyonale inyanga ka Nhlolanja kuthi ngemva kwalokho livakatshele ele Orlando Pirates elase South Africa mhla ziyithoba minwe mbili kunyanga kaMbimbitho ikanti emdlalweni walo owokucina owesibaya sika Group B lizemukela ele Esperance mhla zilitshumi lesithupha kuyo njalo inyanga ka Mbimbitho.
Iqembu le Orlando Pirates yilo elihlezi phezu kwengalane yesibaya sika Group B lilemiklomelo emihlanu okulinani eliphethwe liqembu elihlezi endaweni yesibili ele Esperance njalo lawa maqembu atshayane aze abhekana kungela elenelise ukulitshayela emambuleni ngoMgqibelo emdlalweni oqhutshelwe elizweni le South Africa.
Iqembu le Horoya AC lona lihlezi endaweni yesithathu lilemiklomelo emithathu.
Ngokwakuqala ukuba iqembu le FC Platinum liphatheke kumidlalo yezibaya kumncintiswano we CAF Champions League selokhu laqala ukuphatheka kumidlalo eyokudinga intshantshu zezwekazi lase Africa okuyikho okwenza umqeqetshi walo uMapeza athi bona basafunda kodwa nxa kungenzerka isimanga linqobe kumidlalo yalo emithathu lingazithola selidlulele kusigaba esilandelayo esama quarter-finals.