amalinks wokungena

Breaking News

Justice Mathanda Moyo: Akumelanga Abantwana Bebhale Kutsha Umhloliso weSilungu


Igqwetha leZIMSEc, uMnu. Zvobgo Tawanda Zvobgo, legqwetha labazali, uMnu. v, phandle kwewofini kamahluli womthethwandaba uJustice Matanda Moyo.

Umahluli wedale leHigh Court, uJustice Loice Matanda Moyo, usemise ukulotshwa kutsha komhloliso wezifundo zephepha lesibili eleSingisi obekumele kwenziwe ngoLwesihlanu kulandela isinqumo sikamphathintambo wezemfundo othi kulezifundi ezaqilibezayo ngokuthola leliphepha phambilini komhloliso.

Bafuna kuvalwe uhlangothi lweZIMSEC.
Bafuna kuvalwe uhlangothi lweZIMSEC.

UJustice Matanda Moyo usole indlela abogatsha lwezemfundo abaphathe ngayo loludaba lwemihloliso esithi isinqumo sokuba lumhloliso ulotshwe kutsha bekuzojezisa labangelamlandu wokuqilibezela.

Njalo uthe iziphathamandla zogatsha lwezemfundo aluzange lukhulumisane ngokufaneleyo labazali kanye laye wonke ophatheke kuloludaba ukubonisana ukuba kwenziweni.

UMnu. Denford Halimani, Igqwetha le Zimbabwe Lawyers for Human Rights ebelimela abazali abahambise loludaba edale leHigh Court, uthe bayasemukela lesis’inqumo esithethwe lidale.

Unobhala jikelele wogatsha lwezemfundo ye Primary le Secondary, Dr. Sylvia Utete Masango, usemnhlanganweni lenkokheli yeTransform Zimbabwe ebizokwethula ingcwadi yezikhalazo.
Unobhala jikelele wogatsha lwezemfundo ye Primary le Secondary, Dr. Sylvia Utete Masango, usemnhlanganweni lenkokheli yeTransform Zimbabwe ebizokwethula ingcwadi yezikhalazo.

UHalimani uvumelane lensolo kaJustice Matanda Moyo eyokuchothoza iziphathamandla zohlangothi lwe ZIMSEC.

Phambilini kwalesi sinqumo kube lokutshengisela kwabazali lamalunga ebandla eliphikisayo ele Transform Zimbabwe, phezu kodaba lolu.

Abatshengiseleyo laba batshiye ingcwadi yezikhalazo emahofisini edale lephalamende, eyinye emahofisini kamphathintambo wezemfundo kanye lasemohofisini eZIMSEC.

Abatshengisela emigwaqweni bathothoza uMnangagwa lomphathi wezemfundo.
Abatshengisela emigwaqweni bathothoza uMnangagwa lomphathi wezemfundo.

Batshayephansi besithi bebengasoze bavumela abantwababo ukuloba njalo lumhloliso.

Bebethukuthele lababantu ngesikhathi befola njalo besiyatshiya ingcwadi zezikhalazo besithi sebediniwe yikuthathwa lula.

Bathe bafuna umphathintambo wezemfundo uProffesor Paul Mavhima leziphathamandla zohlangothi lwe ZIMSEC batshiye umsebenzi ngoba sebehlulekile ukuwuqhuba.

Abatshengisele emigwaqweni eHarare ngoLwesithathu.
Abatshengisele emigwaqweni eHarare ngoLwesithathu.

Ayisikho kwakuqala ukuqilibezela emhlolisweni kusenzakala kodwa engekho ojeziswayo lanxa zisaziwa lezo zigangi ezabangela ukuphumiswa kwaleliphepha eselivuse umsindo.

Omunye wabekade bekulokhu kutshengisela, uKhansila Mlandu Ncube, ongumgcinisihlalo wabasakhulayo kubandla le MDC-T esigabeni sakoBulawayo, uthe okwenzakalayo kuphambana lalokho okwakuthenjiswa uzulu ngesikhathi umbuso okhona uqala nyakenye.

UNcube uthi mazixotshwe umsebenzi iziphathamandla ze ZIMSEC ngoba sezehlulekile.

Ozakhokha imali yokuloba kutsha imihloliso ngubani?
Ozakhokha imali yokuloba kutsha imihloliso ngubani?

Bebekhona abamabandla okholo okubalisa uMnu. Thabani Ncube owenkonzo ye AFM elilunga njalo leTransform Zimbabwe. Usole inyathelo ebelithethwe ngabe ZIMSEC.

UMnu. Rodney Takaruza, okhokhela uhlangothi oluqoqa inhlelo zebandlai leTransform Zimbabwe (Chief of Protocol ), uthe bafuna kubelendlela zokukhulumisana lozulu sikhathi sonke iziphathamandla zikahulumende zingakathathi izinqumo hatshi lokho okwenziwe ngabogatsha lwezemfundo yezikolo eziphansi leziphezulu.

Isinqumo esithethwe lidale leHigh Court siza ngesikhathi abazali lozulu besithi bakhathele ngokwenza kuka hulumende.

Facebook Forum

XS
SM
MD
LG