Umsekeli kamqeqetshi weqembu leHighlanders uBekithemba Ndlovu uthi ukukhalala umsebenzi okwenziwa ngabadlali baleliqembu sekuphazamise kakhulu amalungiselelo abo awokuqala kwemidlalo yalonyaka.
Ekhuluma lentathelizindaba zemidlalo ekupheleni komdlalo wokuzwana amandla iqembu le Highlanders eliwudlale lele Chicken Inn ngeSonto, uNdlovu uthe iqembu leBosso libhekane lenkinga eyokuba imidlalo yalonyaka izaqala inengi labadlali balo bengekho kusimo esokuthi sebangamelana labosowabo abamanye amaqembu.
Inengi labadlali beqembu leHighlanders balamaviki amabili besala ukuzilolonga bekhonona ngokuba abakatholi iholo labo lenyanga kaZibandlela leka Nhlolanja njalo uNdlovu uthi isimo lesi kasiphathisi muntu.
“Inengi labadlali kasilabo okwamanje njalo lesisimo kasiphathisi muntu ngoba labo abadlali bakhutha ithuba lokuzilolonga okokokuthi loba kungalungisiswa okuhluphayo abadlali bazabe bengakulungelanga ukudlala ngesikhathi kuqala imidlalo yalonyaka.
“Isifiso sami ngesokuthi baphange baphenduke ukuze siqhubeke ngamalungiselelo ngoba nxa singehluleka ukulungiselela kusaselesikhathi siyabe silungiselela ukwehluleka.”
Nyakenye iholo labadlali beqembu leHighlanders belibhadalwa yinkampani yabomakhalekhukhwini eye Net One kodwa lonyaka abakatholi lutho loba nje kuke kwaba lemibiko ethi linkampani ilobelane isivumelwano esitsha leqembu leBosso esokuba iqhubekele phambili isekela leliqembu ngemali.
NgeSonto iqembu leHighlanders lidlalise abadlali abasakhulayo abangakhalalanga umsebenzi kanye labanye abadlala kuqembu leBosso 90 elidlala kusigaba se Southern Region bona ababhaxabulwe nge 4 ka nya liqembu le Chicken Inn.
Lonyaka iqembu leHighlanders belikhangelelwe ukuba ngelinye lamaqembu elizalwisa ukuphakamisa inkezo yeligi ngemva kokuba lithole abadlali abambalwa abalolwazi lokudlala kusigaba saphezulu esePremier Soccer League abagoqela uPrince Dube, uBukhosi Sibanda, uNqobizitha Masuku, uCleopas Kapupurika kanye lo Wellington Muuya.
Nyakenye umqeqetshi weqembu leBosso uMadinda Ndlovu uthe yena ngumnyaka owokuphendukisa isiko laleliqembu kuthi lonyaka ke emnyakeni wesibili babe sebelwisa ukuphakamisa inkezo kodwa lokhu sekuzakuba nzima ngenxa yokuba amalungiselelo aleliqembu awokuqala kwemidlalo yalonyaka esephazamiswe yikukhalala komsebenzi okwenziwa ngabadlali.
