amalinks wokungena

Lokhe Likhokhela Iqembu leChicken Inn

  • Joseph Njanji

Iqembu leYadah linqobe eleChicken Inn.

Lilokhu lihlezi phezu kwengalane iqembu le Chicken Inn loba nje linqotshwe ngele Yadah ngoMgqibelo odluleyo.

Iqembu le Chicken Inn linqotshwe nge 2 ka 1 liqembu le Yadah ngoMgqibelo okuyimpumela ebingakhangelelwanga ngabanengi abalandela umdlalo wenguqu njengoba abafana beGamecocks bebetshaya eziwayo phambilini kokudibana leqembu le Yadah lona elingelinye lamaqembu aqhuba nzima lonyaka.

Loba kunjalo iqembu le Chicken Inn lale lilokhu lihlezi phezu kwengalane yemiklomelo lilemiklomelo engamatshumi amahlanu lanye njengoba lelo ebelilethuba lokulihwitha ele Dynamos libe ngutshiki lobhanqa 1 ka 1 lele Highlanders ngeSonto.

Ukwehluleka ukuthola imiklomelo emithathu kweqembu le Dynamos kudale ukuba lehle liyehlala endaweni yesithathu engalaneni lilemiklomelo engamatshumi amane lathoba munwe munye kuthi iqembu le FC Platinum yilo eselihlezi endaweni yesibili lilemiklomelo elingene leye Chicken Inn ngemva kokunqoba ele How Mine nge 1 ka nya ngoMgqibelo.

Kundawo yesine kuleqembu le Ngezi Platinum Stars lona elinqobe ele Harare City nge 2 ka 1 ngoLwesihlanu njalo elilingene leye Dynamos.

Emsileni wengalane ikhuba liyala lilokhu litshona kuqembu le Bantu Rovers lona elinqotshwe nge 3 ka 1 ngele CAPS United okuyimpumela etsho ukuba liyale lilokhu lijeke amanye amaqembu engalaneni lilemiklomelo elitshumi lambili ikanti phezu kwalo iqembu le Tsholotsho lilemiklomelo elitshumi lesithupha njalo libe ngutshiki lobhanqa leqembu le ZPC Kariba ngoMgqibelo.

Umqeqetshi njalo engumnikazi weqembu le Bantu Rovers uMethembe Ndlovu uthi yena yebo kambe ukunqoba kuyala kuqembu lakhe kodwa okuqakathekileyo kibo yikuba abafana babo befunde ibhola.

“Badlalile abafana kwehlule yebo imiklomelo kasiyitholanga kodwa ngibona angathi sizamile kakhulu yikuthi nje besidlala leqembu eliqinileyo. Inhlanhla esilayo yikuthi asifani lamaqembu amanengi esikwenzayo yikuthi sizama ukuba sibengcono ngemihla ngemihla asikhangeli kakhulu impumela loba sinqotshiwe sikhangela ukuba yikuyini esikufundileyo. Labafana bethu sihlezi sibatshela ukuba bengazikhathazi kakhulu ngempumela bona babe lendaba lokufunda ibhola.”

Kolunye udaba olumayelana lomdlalo wenguqu umncintiswano we Cosafa Women’s Championships ukhangelelwe ukuqala ngoLwesithathu edolobheni lako Bulawayo njalo uzadlalelwa enkundleni ezibalisa eye Barbourfields kanye leye Luveve.

Iqembu le Zimbabwe likusibaya sika Group A ndawonye le Zambia, Madagascar kanye le Malawi. Kusibaya sika Group B kuleqembu le Kenya, ele Mauritius, Swaziland kanye lele Mozambique.

Iqembu le South Africa likusibaya sika Group C ndawonye lele Namibia, ele Lesotho kanye lele Botswana.

Abaqali besiziba liqembu le Namibia lele Botswana wona azadibana kugamanxa ihola letshumi ekuseni kulandele umdlalo ozakuba phakathi kweqembu le Zambia lele Malawi ngehola lesibili emini kuthi iqembu le Zimbabwe lizangqikilana lele Madagascar kugamanxa ihola lesine emini yantambama.

Yonke limidlalo izaqhutshelwa enkundleni yeBarbourfields kuthi ngoLwesine imidlalo izadlalelwa enkundleni yeLuveve lapho iqembu le Mauritius elizadlala khona lele Swaziland, ele Kenya lizadibana lele Mozambique kuthi ele South Africa lizadlala lele Lesotho.

Facebook Forum

XS
SM
MD
LG