amalinks wokungena

Breaking News

Mark Harrison: Sizimisele Ukuphakamisa Inkezo yeCastle Challenge Cup


Umqeqetshi weqembu leHighlanders uMark Harrison. (Photo: Joseph Njanji)

Umqeqetshi weqembu lomdlalo wenguqu eleHighlanders uMark Harrison uthi bazimisele ukuphakamisa inkezo yeCastle Challenge Cup ngoMgqibelo lapho abadibana lentshantshu zesigaba sePremier Soccer League iqembu leFC Platinum.

UHarrison uthi iqembu leHighlanders selikwenze konke okusemandleni alo ukulungiselela imidlalo yalonyaka njalo bawulindele ngamehlo abomvu owakusasa wona athi bakhangelele ukudlala kuhle banqobe.

“Sibe lamalungiselelo amahle kakhulu silungiselela imidlalo yalonyaka njalo abadlali bethu labo batshengisa ukuba bayamukele kuhle lokhu ebesikwenza. Lumdlalo wangoMgqibelo ngumdlalo omkhulu kithi kanye lakuqembu leFC Platinum njalo ngumdlalo esifuna ukunqoba kuwo.

Ngokubona kwami sesilungiselele saphelela osekusele yikuba sidlale.”

Umdlalo weCastle Challenge Cup udlalwa phakathi kweqembu eliphakamise isicoco seligi kanye leqembu eliphakamise inkezo yeChibuku Super Cup njalo nyakenye iqembu leFC Platinum yilo eliphakamise isicoco seligi kuthi ele Bosso yilo eliphakamise inkezo yeChibuku.

Isikhulumeli seZIFA uXolisani Gwesele. (Photo: Joseph Njanji)
Isikhulumeli seZIFA uXolisani Gwesele. (Photo: Joseph Njanji)

Kusenjalo abadlali beqembu leHighlanders ababalisa ukaputeni weqembu njalo engunozinti uAriel Sibanda, imvimbi uPeter Muduhwa kanye lomgadli uPrince Dube kabasayikuba yingxenye yeqembu elizamela ilizwe le Zimbabwe kumncintiswano we African Nations Championship iChan ngamafitshane, ngemva kokuba iqembu leBosso lingabakhululanga ngoba lifuna bedlale kumdlalo we Castle Challenge Cup.

Isikhulumeli senhlanganiso yeZimbabwe Football Association uXolisani Gwesela utshele intathelizindaba ukuba abaqeqetshi beqembu lama Warriors bathe laba badlali abasekho enhlelweni zabo.

“Sithole umbiko ovela kubaqeqetshi beqembu lesizwe besithi abadlali beqembu leHighlanders kababuyanga ukuzololonga labanye njalo ngalesosizatho abasoze babe besabakhangela.

Iqembu le Highlanders lona belisitshelile ukuba abadlali balo liyabasebenzisa kumdlalo we Castle Challenge Cup kodwa abaqeqetshi bona bathethe isinqumo esokuba bahle bayekele ukuba yingxenye yeqembu lesizwe.”

UGwesela ubekhuluma esenkundleni ye Barbourfields ko Bulawayo lapho obekuhlolwa khona linkundla ngabamele inhlanganiso yeFIFA ukuba ilungele yini ukudlalelwa imidlalo yokudinga amaqembu azakuyaphatheka kumncintiswano wezizwe zomhlaba.

Izizalwane zelizwe lase South Africa uMark Fish kanye lo Derek Blanckensee yibo abakade behlola linkundla njalo uFish utshele intathelizindaba ukuba kuqakathekile ukuba amazwe angezansi kwezwekazi lase Africa abe lenkundla ezicacayo.

Owake wadlalela iqembu leBafana Bafana uMark Fish (Photo: Joseph Njani)
Owake wadlalela iqembu leBafana Bafana uMark Fish (Photo: Joseph Njani)

“Kumele sikunanzelele ukuba sisalele emuva kakhulu nxa siqathanisa lamazwe asenyakatho yezwekazi lase Africa. Nxa ngikhangela inkundla ezisentshenziswe kumncintiswano weAfcon owedluleyo oqhutshelwe kwele Egypt kulomehluko omkhulu phakathi kwenkundla zabo lezamazwe angezansi yezwekazi.

“Kumele sisiguqule lesisimo ngoba sidlala inguqu elohlonzi yikho ke kumele lenkundla zakhona kube zinkundla kuzwa ezihambelana lendlela esidlala ngayo.”

Inkundla zomdlalo wenguqu elizweni le Zimbabwe zivele ziphakathi kokulungisiswa ngoba zingasavunyelwa ukuba kudlalelwe kuzo imidlalo eqoqwa ngaphansi kokuqondisa kwenhlanganiso yeConfederation of African Football ngoba kuthiwa bezingekho esimeni esihle.

Ngenxa yalokho iqembu lama Warriors likhangelelwe ukuba lidlalele elizweni lase South Africa ekupheleni kwalinyanga lapho okumele lidlale khona leqembu leAlgeria.

Akukacaci ukuba lumdlalo uzadlalelwa kuyiphi inkundla kodwa uGwesela uthe lokhu kuzakube sekusazakala ensukwini ezilandelayo.

Ezemidlalo siloJoseph Njanji
please wait

No media source currently available

0:00 0:03:16 0:00


Facebook Forum

XS
SM
MD
LG