amalinks wokungena

Breaking News

EleMelika Lithi Ilziwe leZimbabwe Kalihloniphi Ilungelo Likazulu


Intathelizindaba ebezilalele ngesikhathi kusethulwa umbiko wezijeziso zenotho ngomele ilizwe leMelika. (Photo: Mlondolozi Ndlovu)

Ilizwe leMelika lithi izijeziso zomnotho ezetheswa inkokheli yebandla leZanu PF kayisizo ezibhidliza umnotho wele Zimbabwe.

EleMelika lithi uhulumende uMongameli Emmerson Mnangagwa kumele alandele konke okumele kwenziwe ukuze izijeziso lezi zesulwe.

Lokhu kuphume embikweni owethulwe ngabamele eleMelika wokukhangela ukuthi uhulumende weZimbabwe uphathe njani udaba lokulondolozwa lokwephulwa kwamalungelo kazulu ngomnyaka odluleyo ka 2019.

Ekhuluma lentathezindaba eseWashington DC, umsekeli wommeli wogatsha olubona ngamalungelo abantu kwele Melika, uMnu Robert Destro, uthe ukukhitshwa kwezijeziso ayisikho kodwa okungenza amalungelo kazulu ahlonitshwe.

UDestro uthe kumele inkokheli kahulumende weZimbabwe ihloniphe amalungelo kungelani lezijeziso lezi.

“Izijeziso zomnotho kuphela kazeneli ukuba zilethe amalungelo abantu. Ukuze kube lamalungelo abantu kumele abantu beZimbabwe bezimele. Thina esingakwenza kuphela yikuthi sincedisane labo njalo sihlonipha ukuba ilizwe leZimbabwe lizimele lodwa.”

Uphinde wathi kuqakathekile ukuthi eleZimbabwe lisebenze nzima ekuletheni inguquko ukuthi izijeziso lezi zikhitshwe.

“Ngibona engani okukhona eZimbabwe yikuthi izijezsio zingakhitshwa. Ngingamangala nxa abantu bengazihluphi ukusebenza ekuthini izijeziso lezi zikhitshwe.”

Ingcwethi kwezombusazwe, uMnu. Mlungisi Dube, uthi kulungile eleMelika likhuze inkokheli yebandla leZanu PF ngoba kayihloniphi amalungelo abantu.

“Kulungile lokhu nxa sikhangela izenzo zenkokheli yebandla leZanu PF. Kusukela lapho bethathatha umbuso sasisithi kuzakuba lenguquko. Kulungile ukuthi bafakelwe izijeziso kulokuthi babe besiya kholisa imali abazintshontshayo.”

UMnu. Munashe Mtutsa, owebandla leZanu PF, uthi bazimisele ukugula isimo elizweni kodwa abangakufuniyo yikuba batshelwe okokwenza ngamanye amazwe anjengeMelika.

“Inguquko eyenzakala elizweni itshengisa ukuthi uhulumende weZanu PF uzimisele ukuguqula ilizwe. Ukuthi bethi asizimsielanga kuyize.”

Ugwalo lolu luveze ukuhlukunyezwa kwabantu okwenzakala eZimbabwe kugoqela ukubotshwa mahlayana kwabantu okungekho emthethweni ngenxa yokuphikisana lohulumende

EleMelika lithi njalo isimo semajele eZimbabwe kasijabulisi ngoba izibotshwa lazo zilamalungelo azo okumele ahlonitshwe.

Ukubotshwa kwentathelizindaba lokuvalwa kobulembu beInternet ngezinye zezinto abathi zenza isimo samalungelo abantu elizweni sibe sibi.

EleMelika lithi lanxa kwakhitshwa owayengumongameli umuyi uRobert Mugabe, ukwenza kukahulumende kaMongameli Emmerson Mnangagwa akutshiyananga ngitsho lakancane lokuka Mugabe.

Facebook Forum

XS
SM
MD
LG