Abantu beZimbabwe bamanyane lamanye amazwe womhlaba ngoLwesibili ekunanzeni usuku lokuqakathekiswa ukulondoloza amalungelo oluntu, olwe International Human Rights Day.
Abenhlanganiso ezizimeleyo ezokulwela ilungelo loluntu bachaze umnyaka ka2019 njengomnyaka obenzima kakhulu ekulondolozeni lawo malungelo.
Embikweni abawethulele abezindaba wokunanza ilanga leInternational Human Rights Day, abenhlanganiso yabodokotela abasebenzisana lozulu ukulondoloza amalungelo kwezempilakahle, eyeZimbabwe Association of Doctors for Human Rights bathi bakhathazekile kakhulu ngesimo esiselizweni.
UNkosazana Sandra Dizwani, elinye lamagqwetha abona ngokulondolozwa kwelungelo loluntu, uthi kunengi okubi okubhekane labantu kwezamalungelo oluntu okugoqela ukwethuselwa nguhulumende.
Abenhlanganiso yamagqwetha elwela ukulondolozwa kwamalungelo oluntu, eye Zimbabwe Lawyers for Human Rights labo bathi izehlakalo zomnyaka ka2019 ziyethusa ikakhulu ngenxa yokuthi zenziwa ngokumele balondoloze umthetho abohlangothi lwezomvikela abagoqela amapholisa labebutho.
Unobhala wohlangothi lwabasakhulayo kuMDC, uOstallos Gift Siziba, kuthi bathwele nzima kwele Zimbabwe okukhahlanyezwa ilungelo likazulu nguhulumende.
Uhulumende uthi okuhluphayo eZimbabwe ngamabandla aphikisayo ahlamukela uhulumende.