Umlandeli weqembu lenguqu eleHighlanders, uMnu. Thembelenkosini Hloli, obhubhe ngeNsonto kulandela ukulwa phakathi kwabalendeli beHighlanders leDynamos, ukhangelelwe ukuthi uzangcwatshwa kusasa eLower Gweru.
Umnewabo, uMnu. Lovegate Hloli, utshele iStudio 7 ukuthi amapholisa lokhe ehlolisisa udaba lolu olutshiye abalandeli beHighlanders bethithibele.
Uthi banengi abantu abancedise ukuthi kulungiselelwe ukungcwaba uThembelenkosini, owayefundela ukulungisa okuhambelana lezitimela eNational Railways of Zimbabwe.
Amapholisa koBulawayo ayalile ukukhuluma ngodaba lolu esithi asaluhlolisisa.
Kubikwa ukuthi sokubotshwe abantu abambalwa kulandela ukufa kukaThembelenkosini.
Iqembu leHighlanders lanqotshwa ngeleDynamos 1-0 emdlalweni okwakukhangelelwe ukuthi lizanqoba enkundleni yeBarbourfields Stadium.
Sokuleminyaka eyisificaminwe mibili iqembu leBosso lisehluleka ukunqoba eleDynamos.
Kunjalo nje, kuhlelo lwethu Liphuma Lendaba sixoxa lo Ezra Tshisa Sibanda ngodaba lobudlwangudlwangu emdlalweni wenguqu, ikakhulu sibheke udaba lokubulwa kuka Hloli.
