amalinks wokungena

Breaking News

EleZimbabwe Lamukela Amajekiseni eSinovac Athengwe eChina Ngesikhathi Limemetheka Ngamandla Igciwane leCOVID-19


Indawo yokuhlaba abantu ijekiseni yeSinopharm lamanye. (VOA)

EleZimbabwe namuhla lamukele amajekiseni ayisilinganiso sama doses ayisigidi awohlobo lweSinovac athengwe kwele China. Kukhangelelwe ukuba eleZimbabwe lizakwamukela njalo namuhla ama-Syringes afika izigidi ezintathu -3 million. Lokhu kwenzekala ngesikhathi kulabantu abafika phose ikhulu – 89 ababulewe ngumkhuhlane weCOVID-19 izolo elizweni.

Ekhuluma ngesikhathi esamukela amajekiseni la, umphathintambo kahulumende obona ngezemali, uMnu. Mthuli Ncube, uthe uhulumende uzama ngamandla wonke ukuthenga amajekiseni okuvikela abantu kumkhuhlane weCOVID-19.

UNcube uthe inengi imali esetshenziswa ekuthengeni amajekiseni la.

UDokotela John Mangwiro, umsekeli womphathintambo kahulumende obona ngezempilakahle, uthi banengi abantu abafuna ukuhlatshwa ijekiseni yokuzivikela kumkhuhlane weCOVID-19 ngakho-ke sokuvunyelwa ukuba abantu bayehlatshwa enkambeni zamapholisa.

Sokulabantu abafika phose isigidi lengxenye - 1,438,890 asebehlatshwe okwakuqala ijekiseni yokuzivikela kukhuhlane weCOVID-19.

Abedlula inkulungwane eziyisithupha – 670,000 sebehlatshwe ijekiseni yesibili. Umemetheka ngamandla umkhakha wegciwane leCOVID-19 eZimbabwe obizwa kuthiwa yiDelta variant. Bathithibele abantu ngokwenzakala eZimbabwe.

UMnu. Sakhi Ncube, ohlala eGwanda, uthi sebedlela evalweni abantu ngomkhuhlane lo.

"Inhliziyo yami idabukile nxa ngicabanga isimo esibhekane laso, abantu bayafa and iCOVID-19 is real. And kuqakathekile ukuthi abantu baqhubeke beqgoka ama-mask abo but the sad part yikuthi sometimes uyabona abantu behamba bengagqokanga ama-mask yethi li-Delta Variant ekhona iphila emoyeni. "

UMnu. Desire Tshuma, intathelizindaba esebenza izimele, laye uthithibele kulandela okwehlele umdeni wakhe.

"Ukugulelwa yisihlobo sakho esiseduze ngumkhuhlane lowu osuqede abantu umhlaba wonke, kubuhlungu kakhulu. Mina ngigulelwe yizihlobo zami, obhudi bami ababili lonkosikazi kabhudi wami engmlandelayo, bonke babanjwa ngumkhuhlane lowu, iCOVID-19, ngasikhathi sinye. Okunye okwenze ngaba lobuhlungu kakhulu besengingaselathemba lokuthi bengasila yini njengoba bonke bebengakahambi ukuyahlatshwa iVaccination yeCOVID.”

UMnu. Philani Ngwenya, ohlala eZhombe, uthi abantu kabalandaba lokumemetheka kwegciwane leCOVID-19.

“Thina ngapha emakhaya lapha, eZhombe, koJoel lapha, iCORONA sikhona kodwa abantu kabayinaki. Babona engani ngeyokudlala, kungafiwa, kuyatshona kugcwele emfeni kodwa yikho lapho okunikanwa khona imikhuhlane. Ngithemba abantu bengalandezela lokho okukhulunywa nguhulumende ukuthi sibe singani siyawunaka umthetho, awusoke usabalale umkhuhlane.”

Okhokhela isibhedlela seMpilo koBulawayo, uSikhwicamfundo Solwayo Ngwenya, ukhala ngokwenziwa ngabantu ngesikhathi kumemetheka igciwane leCOVID-19.

"Okwakhathesi nxa abantu bengaboni isimangaliso esibuyayo, umkhuhlane lowu, uyalandela abantu lapho abahlangana khona. Manje abantu lokhe behlangana, abantu lokhe befuna ukuthengisa besenza izinto zabo abazijwayeleyo. Yikho kusiyaphambili, mina ngibona umkhuhlane lowu uzabe lokhe umemetheka usiya phambili.”

UNgwenya uthi uzaphela nzima umkhuhlane weCOVID-19 ngoba abantu kabaziphathi ngemfanelo.

"Uzabe lokhe usibulala, uphenduke, uzophenduka ngelinye ihlandla ubulale, uhambe ngoba abantu hayi, abantu bayala sibili lanxa ubatshela bathi khona akula CORONAVIRUS, ngamanga, akulabhubhane olunjalo, aluhlaza. Pho abantu nxa belengqondo enjalo kunzima ukuthi sibantshintshe.”

UDokotela Agnes Mahomva, umqondisi obona ngokuqhutshwa kwenhlelo zokulondolozwa kwabantu kumkhuhlane weCOVID-19 kuhlangothi lweNational Response to COVID-19 Pandemic in Zimbabwe, uthi limemetheka ngamandla igciwane leCoronavirus eZimbabwe.

"Okwamanje amanani abatholakala belalolubhubhane labalahlekelwa yimpilo aqhubeka eqonga eZimbabwe. Njalo lokhu kubangelwe yikungalimuki ingozi ekhona, okuyinto ekhathazayo.”

Uhlangothi lwezempilakahle lubika ukuba kulabantu abedlula inkulungwane lengxenye - 1,591 abahlolwe izolo eZimbabwe batholakala belegciwane leCOVID-19.

Kusenjalo, umabhalane omkhulu wohlangothi lukahulumende olubona ngezokwethulwa kwemibiko, uMnu. Nick Mangwana, ubike enkundleni yokuxhumana eyeTwitter ukuba sokulomthetho omutsha ovimba odokotela labongi ukuba bekhalale umsebenzi.

Udaba Esilethulelwe NguMavis Gama
please wait

No media source currently available

0:00 0:05:23 0:00


Facebook Forum

XS
SM
MD
LG