amalinks wokungena

Breaking News

Iqembu leZimbabwe Warriors Lizangqikilana leleAlgeria eBarbourfiels Stadium Na?


The Zimbabwe Warriors were expected to perform well at the AFCON finals in Gabon. (Photo: CAF)

Balwisa ukuba babe sebeqedile ngoMvulo abalungisa inkundla yeBarbourfields koBulawayo besithi mhlawumbe kungenelisa ukubanjwa kwesikhathi sokuthi iqembu elimela ilizwe emdlalweni wenguqu, elama Warriors lidlalele eZimbabwe emdlalweni walo weConfederation of African Football (CAF) lele Algeria.

Ekhuluma lentathelizindaba ngemva komhlangano awuqhube leziphathamandla zekhansili yako Bulawayo ngoLwesihlanu , umsekeli kamphathintambo wogatsha lwabatsha, ezemidlalo, lokuzilibazisa, uTino Machakaire, uthe uyasuthiseka ngendlela okuqhutshwa ngayo umsebenzi wokulungisisa inkundla ye Barbourfields.

“Ngokubona kwami umsebenzi uqhubekela phambili kuhle njalo sikhangelele ukuba kuzathi kufika usuku lwethoba munwe munye umsebenzi sizabe sesiwufezile njengokutsho kwalaba abaphezu kwawo. Nxa singakwenelisa lokhu labo abazahlola inkundla bazathola konke sekusesimeni esihle.”

Umsebenzi wokulungisa inkundla ezibalisa eyeBarbourfields kanye leye National Sports Stadium uqhutshwa ngoba inhlanganiso yeConfederation of African Football ithe kazilungelanga ukudlalelwa kuzo nxa iqembu lesizwe lidlala lamaqembu akwamanye amazwe.

Inkundla yeBarbourfields yona ithathelwe ilungelo elokuba kudlalelwe kuyo imidlalo le ensukwini ezedluleyo ngemva kokuba ikhansili yedolobho lako Bulawayo, okuyiyo abanikazi, ingalungisanga lokho obekuthiwe yinhlanganiso yeCAF kumele kulungisiswe.

Lokhu kugoqela isimo senkundla ngokwaso ngoba kuthiwa utshani bumele bube luhlaza tshoko yonke indawo ikanti lamasango kumele kube ngamasango akhupheka lula njalo engawe aluminium.

Kumele kungezelelwe izambuzi emakamelweni okugqokela khona abadlali kuphindwe kufakwe lamatafula umuntu alala khona nxa bemcovacova, imassage table.

Okunye njalo kuthiwa kumele kube kubhalwe kukhanya kuhle izaziso ezincedisa ukuba abantu babekwazi ukuba baqonde ngaphi.

Nxa ukulungiswa kwenkundla yeBarbourfields kungaphela ngoMvulo, abenhlanganiso elawula umdlalo wenguqu kwele Zimbabwe abeZimbabwe Football Association, bazathumela imifanekiso yalokho osokwenzakele kunhlanganiso yeCAF ngoLwesibili.

Ngemva kwalokho kukhangelelwe ukuba inhlanganiso yeCAF ithumele abantu abazohlola inkundla kuthi ingapasiswa ukuba isilungile iqembu lama Warriors lizabe selizadlalela kuyo lele Algeria mhla zingamatshumi amabili lathoba munwe munye kuyonale inyanga.

Nxa limizamo ingehlula kuyabe sekumele umdlalo lowo uqhutshelwe ngaphandle kwelizwe.

Kolunye udaba olumayelana lomdlalo wenguqu, iqembu leHighlanders lizadibana lele Chapungu ngeSonto emdlalweni owokuzwana amandla phambilini kokuqala kwemidlalo yalonyaka.

Facebook Forum

XS
SM
MD
LG