Abanikazi bamabhasi lezinye izimota ezithwala uzulu bakhangelelwe okusemthethweni ukuthi bathenge okuthiwa yi-Passenger Insurance ukwenzela ukunceda abalahlekelwa kumbe abalimalelwa yizihlobo engozini zemigwaqweni.
Kulabantu abanengi abalimala labafa engozini zemigwaqweni nsukuzonke kwele Zimbabwe. Kulabantu abafika phose amatshumi ayisikhombisa abasanda kufa engozini zemigwaqo elizweni kulandela ukubhewuka kwamabhasi lezinye izimota kunsukwana ezisanda kwedlula.
Kulabanye abasezibhedlela abalimala engozini lezi lezinye abehluleka ukuhlawula imali efunakalayo.
Abenhlanganiso yeInsurance and Pensions Commission bathi abantu abanengi kabakwazi ukuthi abanikazi bezimota ezithwala uzulu balomlandu wokuhlawulela labo abafa kumbe abalimala emigwaqweni.
Isikhulumeli sekhomishini le, uMnu. Lloyd Gumbo, uthi kuqakathekile ukuthi abanikazi bezimota ezithwala abantu babe le insurance.
Abenhlanganiso yamagqwetha alwela ilungelo loluntu eyeAbammeli Human Rights Lawyers’ Network bathi kuqakathekile kuzulu ukuba azwisise phezu komthetho othinta indaba zengozi zemigwaqweni owe Road Traffic Act.
Uthi abanikazi bemota ezingamelanga zingene emigwaqweni kumele bahlawule abafileyo kumbe abalimeleyo nxa kungozi.
Omunye wabalahlekelwa yizihlobo engozini yomgwaqo, uMnu. Evance Shava, isakhamuzi sakoBulawayo, uthi kubuhlungu ukufelwa yisihlobo engozini yezimota.
Isikhulumeli sebandla lePassenger Insurance Policy, uMnu. Nobert Mafu, uthi kumele idale lephalamende libumbe eminye imithetho ekhangelane labantu abafela engozini zemigwaqo.
Abafelwa kumbe abalezihlobo ezilimala engozini yezimota bakhuthazwa ukuba bakhulumisane labasebenza kweze insurance ukwenzela ukuthi bahlawulwe ngemfanelo.