amalinks wokungena

Breaking News

IMelika Ifakela uRegistrar-General Izijeziso Zenotho


UMongameli Barack Oboma
EleMelika selesulele amanye amalunga alitshumi ebandla le Zanu PF izijeziso kodwa laselifaka uMnu. Tobaiwa Mudede obona ngokubhaliswa kwabantu lezokhetho kuluhlu lwamagama abantu abavotayo.

Iphephandaba le Daily News lithi umbiko osanda kwethulwa luhlangothi lukakulumende weMelika olubona ngezemali utshengisa ukuthi labo abesulelwe izijeziso lezi ngusomabhizimusi olodumo uMnu. Billy Rauternbach, umuyi uMnu. John Nkomo owayengumsekeli kaMongameli Robert Mugabe, uMnu. Paul Mangwana, UNkosikazi Sithembiso Nyoni umphathintambo obona ngezamabhizimusi athuthukayo, lowayesekela umphathintambo wezemfundo uMnu. Isaiah Shumba.

Abanye njalo nguNkosikazi Marian Chombo owayengunkosikazi kamnumzana Ignatius Chombo, uMnu. Peter Nyoni, uNkosikazi Victoria Chitepo, lomuyi umnumzana Kumbirai Kangai.

Inkampani ebizwa ngokuthi yiRingerpoint Overseas layo isuswe kuluhlu lwezijeziso lezi. Abangene kuluhlu lwezijeziso kanye loMudede nguMnu. Sam Pa wakwele China loMnu. Jimmy Zereni we Singapore abasebenzela eZimbabwe. Inkampani elebodlelwano lelizwe leChina iSino-Zimbabwe layo isifakwe kulolu luhlu.

Kusenjalo, Umongameli Barack Obama weleMelika utshayele ihlombe uzulu weZimbabwe ngokufikisa kwalelo lizwe iminyaka engamatshumi amathathu lane lithole uzibuse wathi ilizwe lakhe lizimisele ukusebenza labantu be Zimbabwe ukuze bathuthukise inhlalakahle yabo.

U-Obama wethule umbiko longoLwesine esithi ilizwe lakhe lizaqhubeka lisekela abantu be Zimbabwe abafuna ukuthi bakhululeke, baphumelele njalo babe lenhlalakahle eenhle. Uthe eleMelika likhangelele ukuthi lizasebenza labantu be Zimbabwe ukuthi kubelokuthula njalo lentuthuko.
XS
SM
MD
LG