Intengo yempahla ezitolo isikhuphuke okuphindwe kanengi kulandela ukukhuphulwa kwentengo yamafutha ezimota.
Lokhu ngokunye okwabangela ukuthi uzulu angene emigwaqweni etshengisela ngokukhuphuka lokhu.
Okwengezelele udubo lwentengo yikuthi izitolo ezinengi emalokitshini zagqekezwa ngabantu ababetshengisela.
Umgcisihlalo wenhlanganiso elwela ilungelo labathengi, eye Consumer Council of Zimbabwe esigabeni seMatabeleland, uMnu. Comfort Muchekeza, utshele iStudio 7 ukuthi uzulu ulamandla okwehlisa intengo ngokungathengi impahla elentengo ephezulu kakhulu.
“Into zentengo lapha eZimbabwe akula price control. Ama price uhulumende uyakhulumelana lama producers kuvunyelwane ama price. Intengo iyatshiyana le lale,” kutsho uMuchekeza.
Uthi lanxa kunjalo kulenteno evunyelwanayo ngabathengisayo lohulumende kodwa kungela mthetho obabamba ngamandla.
Uthi njengesibonelo isinkwa simele sithengiswe nge $1.50 kodwa kwezinye indawo sithengiswa nge $2.00.
Ngalokho uthi abanye bathatha ixesha lokutshiswa lokugqekezwa kwezitolo bathengise impahla ngentengo ephezulu kakhulu.
“Abathengi kumele bananzelele ukuthi yibo aba controller intengo. Abathengi bengabambana bethi intengo esiyifunayo yileyi abathengisayo abalamandla okuyikhweza,” kutsho uMuchekeza.
