amalinks wokungena

'Utsho Kahle uJulius Malema Othi uMugabe Kasuke Esikhundleni'

  • Bennedict Nhlapho

UMnu. Julius Malema, umkhokheli weEconomic Freedom Fighters.

Izizalwane zeZimbabwe kweleSouth Africa sezincome umkhokheli webandla le Economic Freedom Fighters (EFF), uMnu. Julius Malema, ngokuphumela engcekeni esithi uMongameli Mugabe akehle esihlalweni lokusola iZanu PF ngokuthi ancintise ukhetho luka 2018.

Ekhuluma emhlanganweni wabezindaba eJohannesburg izolo uMalema, uthi kulusizi ukubona umuntu osekhulile njengomongameli Mugabe elokhu esalela esihlalweni.

UMalema owayesaziwa kakhulu ngokusekela kwakhe uhlelo lokuthathwa ngodli komhlabathi eZimbabwe, uthi ngendlea uMugabe asekhule ngayo asisekho isizatho sokuthi aqhubeke esesihlalweni.

“Ukwalela kukamongameli Mugabe esihlalweni, lalokhu ukuthi nguye ozancintisa ukuba esikhundleni sikamongameli ngo 2018 kubi. Intole eyenziwa ngabasekeli beZanu PF akusinto enhle ebantwini beZimbabwe,kuSADC loba enhlosweni zokuthatha umhlabathi eAfrica ngoba labo abebekhokhela lowo mzabalazo kabasafuni ukusuka ezikhundleni.”

UMalema uthi loba kukunengu umongameli Mugabe asekwenzele ilizwe, sekuyisikhathi sokuyaphumula.

“Siyamcoma ngalokhu asekwenzile njalo sizaqhubela phambili umsebenzi wakhe kodwake babamkhulu, sekwanele. Yehla esihlalweni utshiyele abanye. Banengi abasakhulayo ebandleni leZanu PF abakwazi mhlophe ukuthi kuyini okulungele izwekazi le Africa.”

Amazwi kaMalemale asethole usekelo olukhulu kuzizalwane zeZimbabwe.

Isizalwane seZimbabwe uMnu. Thabiso Ngwenya uthi kalikho elinye iqiniso eledlula lelo elikhulunywe ngumnumnzana Malema.

“Umuntu ole 90 years besekuthiwa khona ubusa ilizwe! Lowana umuntu sekufana lokuthi bayamhluphanje. Sokuthiwa vuka namhlanje uyafuneka kuleliya lizwe elithile kule meeting. Ufike ezilalele akasezwa lutho.”

Omunye laye oweZimbabwe ongathandanga ukuthi igama lakhe laziwe uthi vele abasekeli beZanu pf labo bakwazi mhlophe ukuthi uMugabe akasenelisi ukubusa.

“UMugabe lowana uyi ambrella yabo so ma kuphuma yena bengazithola may abanengi bakhona sebehlupheka empilweni. Abanye may sekuvela amacala angaziwayo because ngendlela iZanu PF e-operator ngakhona kungathi kunes=tsotsi esinengi esenzakalayo ku party leya.”

Abanye bancoma uMalema kokutshela iSADC ukuthi ifunde enhlanganisweni ye ECOWAS ngemva kokuba ithumele amasotsha ukuyakhipha ngenkani obengumongameli weGambia obesesalela esihlalweni ngemva kokunqotshwa ekhethweni.

Kodwake uMalema ubuye wasola ibandla le MDC esithi libandla elisetshensiswa ngamazwe aphestheya afuna ukubuyisela emuva uhlelo lokwabiwa komhlabathi, okuyinto eseyaphiwa yi MDC kanengi.

Esephendula inkulumo kaMalema Ilunga leZanu pf edale lephalamende umnumnzana Psychology Maziwisa, ubhale kufacebook esithi uMalema yindojelana nje ezama ukuzicandela udumo kwezombusazwe.

XS
SM
MD
LG