Amagqwetha asehambise ugwalo lwezikhalazo kuhulumende ekhonona ngokukhahlanyezwa ngamapholisa ahlukuluza njalo uzulu nxa eveza ukungathakazeleli okwenziwa nguhulumende.
Amagqwetha abehlabela efola ezibophe ngamabhanditshi emakhanda njengesibonelo sokulinyazwa bethwele amabhakane amumethe imibiko yokukhuza amapholisa, uhulumende labezomvikela.
Elinye lamagwetha eliphatheke kulokhu kutshengisela, uMnu. Jabulani Ndlovu, osebenzela inkampani yamagqwetha eyeMthethwa and Nyambirai Legal Company, uthi kuyabethusa ukuthi amapholisa ayabakhahlameza besenza umsebenzi wabo.
elinye njalo igqwetha, uNkosazana Sandra Dizwani, ukhuthaze uhulumende ukuba ahloniphe imithetho emunyethwe yisisekelo sombuso.
Amagqwetha la, aqale ngokuya ewofisini yomphathintambo wendaba zasekhaya, bayatshiya ugwalo lwezikhalazo zabo. Besuka lapho baluqondise esigodlweni samapholisa ePolice General Headquarters lapho abanikeze lologwalo isikhulumeli samapholisa, uAssistant Commissioner Paul Nyathi, yena ohle wabaqaga besese Greenwood Park lapho akhulumisane labo khona.
UNyathi uthembise ukuthi uzafikisa lipetition kusikomitshi wamapholisa uPolice General Godwin Matanga.
Ukutshengisela lokhu kuqoqwe ngabenhlanganiso yamagwetha eye Young Lawyers’ Association of Zimbabwe bexhaswe ngezinye njalo ezibalisa eye Zimbabwe lawyers for Human Rights leye Law Society of Zimbabwe.
Ukukhatshwa kwabo ngamapholisa kube yisimanga esikhulu njengoba eyiwo aqhubeka evimba ukutshengisela kwabantu ezikhathini ezinengi.
Kunje abenhlanganiso yabamela abasebenza emabhanga eyeZimbabwe Banks and Allied Workers Union bekhweze udaba lwabo lokwalelwa ngamapholisa ukutshengisela emawofisini omphathintambo wezemali.