Amabandla ezombusazwe aphikisayo kwele Zimbabwe ngoLwesithathu abe lesikhumbuzo sesehlakalo sokubulawa kwabantu ngesikhathi sokhetho mhlaka 27 Nhlangula, 2008.
Abantu abafika phose amakhulu amabili babulawa ngamasotsha kanye labacatshangelwa ukuthi ngamalunga ebandla leZanu PF kukhankaselwa ukhetho lokudinga umongameli, amalunga edale le Senate lelephalamende kanye lamakhansila.
Kwabopha nki elizweni sokuphindwa ukhetho lukamongameli kulandela ukunqotshwa kuka Mnu. Robert Mugabe nguMnu. Morgan Tsvangirai.
Abakhulume emkhosini lo bagoqela uMnu Nkululeko Sibanda, isikhulumeli somkhokheli wecele le MDC -T ekhokhelwa nguMnu. Nelson Chamisa, othe kuqakathekile ukuthi udaba lodlakela lolu luhlolisiswe ukuze abantu bakhumisane umlotha.
“Ngibona ilanga lika june 27 kulilanga elibuhlungu kakhulu sicabanga ngama suppoter eMDC abulawa uPresident Mugabe aze atshontshe ukhetho luka 2008.”
Uthe kumele bakhunjulwe bonke abantu ababulawa ngesikhathi leso lalabo abalimalayo kanye labadilizelwa imizi.
Lokhu kusekelwe nguMnu Reason Munyapwa, osekela umanyano weCoalition for Democracy ekhokhelelwa nguMnu Elton Mangoma.
“Kwaba ngumnyaka okwaba le violence kakhulu eyayibangelwa yi-Zanu PF sikhangele ukhetho lwe re-run olwalumele lubekhona phakathi kuka Morgan Tsvangirai lo Robert Mugabe. So, ilanga leli ngilikhumbula kakhulu ngoba kulilanga elasizwisa ubuhlungu kakhulu , safelwa ngabafowethu abanengi njalo sicela iZanu PF layo ikuvume lokhu ukuthi yenza kwaba lodlame elizweni kwabulawa izihlobo zethu njalo sifuna icompensation, njalo asingeke sibaxolele kungela compensation.”
Owesifazana uNkosikazi Lizzy Zvenyika uthe angacabanga leli langa ziyehla inyembezi.
“Usuku luka 27 June lilanga elingizwisa ubuhlungu kakhulu ngoba lilanga elachitheka igazi ngoba lilanga elafa abantu abanengi. Ngikhangela futhi abantu abalimala babayizigoga ngenxa ka 27 June. Ngiphinda ngizibuze ukuthi iviolence le izaphela nini pho eZimbabwe njengoba isiqalisile ngokudubuka kwe bhomba koBulawayo.”
Abantu abanengi balethemba lokuthi lokho okwenzakala ngomnyaka ka 2008 akusoze kuphinde kwenzakale kukhetho lwalonyaka njengoba uMugabe engasekho esikhundleni njalo uMongameli Emmerson Mnangagwa ekhuthaza ukuthula.