Annastacia Ndlovu
Amalunga ebandla leMDC-T ezabelweni zeMatabeleland athi akumelanga inkokheli ibakhethele abantu abazabemela kukhetho oluzayo.
Athi isikhalazo lesi sasesifikiswe laku Mnu. Morgan Tsvangirai engakabhubhi.
Inengi labantu likhala ngokuthi bakhona asebevele bakhethwa ukuba kabasoze baya kukhetho lwama primary election okuyinto esikhube abantu abanengi.
Bathi kayiqondanga indlela yokukhetha abazabamela kukhetho oluzayo olukhangelelwe ukuthi luzakwenziwa ekupheleni kukaNtulikazi.
UNkosazana Nah Khumalo, umqoqi wenhlelo zebandla leMDC-T esiqintini seLupane, uthi baphanyeka udaba lolu kuziphathamandla zebandla leli uTsvangirai esephila.
Ngakho-ke uthi kumele kulandelwe konke abakufisayo ngoba kuyingozi ukuthi kufakwe abantu ngenkani okumele bavotelwe.
Besaba ukuthi inkokheli yebandla leli kukhanya ingalandelanga ngendlela eqondileyo ekukhetheni uMnu. Nelson Chamisa osebangisana loNkosazana Thokozani Khupe isikhundla somongameli webandla leMDC-T.
Umgcinisihlalo wesiqinti sika Ward 7 koBulawayo, uNkosikazi Sikhumbuzo Mpofu, uthe kaboni uChamisa elendela isisekelo sombuso welizwe leZimbabwe njengoba esehluleka ukulandela isisekelo sebandla lakhe.
UChamisa labanye bakhe bathi wakhethwa ngemfanelo ngoba kwaguqulwa isisekelo sombuso webandla leMDC-T ngesikhathi somhlangano omkhulu owe Congress kwanikwa uTsvangirai, idale leNational Executive kanye leNational Council amandla okukhetha iziphathamandla zebandla kungakenziwa omunye umhlangano ngomnyaka ozayo.
UMqoqi wenhlelo kuMDC-T koBulawayo, uNkosazana Mavis Mlilo, uthe ibandla leli selixotsha amalunga alo asebenza gadalala endaweni abakizo kufakwa abanye abantu.
Isikhulumeli seMDC-T, uNkosazana Thabitha Khumalo, uthe ibandla leli kalisoze lakhethela abantu inkokheli zokuyabamela kukhansili lasedale lephalamende.
