Kuhlandla lapho esikhangela isimo sombusazwe eZimbabwe ngoLwesine sixoxe loNkosazana Thabitha Khumalo umsekeli wesikhulumeli sebandla le MDC ekhokhelwa nguMnu. Morgan Tsvangirai.
UNkosazana Khumalo uthi ibandla lakhe lifuna ukuthi uzulu abelenhlalakahle enhle kulalokhu okwenzakala kulezinsuku eZimbabwe lapho abantu makhaza abadla khona ingqweqwe zomlomo.
“Ibandla lethu limele izifiso lenhlalakahle kazulu. Sonke siyakwazi ukuthi emazweni atshiyeneyo umuntu kumele abengumuntu osebenzayo, othola ukudla njalo othola imithi ezibhedlela. Konke lokhu akukho khonamanje elizweni.”
Uthi ibandla lakhe lifuna ukuguqula konke lokhu ukwenzela ukuthi abantu makhaza bahlale kahle.
Uthi kulungile ukuthi kubelamabandla amanengi aphikisa elibusayo loba nje kumele amabandla la abambane ngesikhathi sokhetho ukwenzela ukuthi akhiphe ibandla leZanu PF embusweni.
UNkosazana Khumalo uthi basahlolisisa ibandla lePeople First elikhangelelwe ukuthi lizabunjwa nguNkosikazi Joice Mujuru owaxotshwa kubandla leZanu PF labanye bakhe ecabangelwa ukuthi wayefuna ukukhipha uMongameli Robert Mugabe esikhundleni.
“Abantu esifuna ukusebenza labo ngabantu abafuna ukukhipha iZanu PF. Labo siyabamukela ngezandla ezimhlophe. Esingakufuniyo ngabantu abathi sebephume lebandla labo kukanti-ke yingxenye yeZanu PF ukuthi benzela ukuthi babuye ebandleni lethu bazediliza ukwenzela ukuthi iZanu PF yanelise ukunqoba.
“Ubuqili babo sesibatshengisile. Khathesi sebedinga ezinye indlela zokuthi badilize ibandla lethu.”
Kodwa-ke uMnu. Rugare Gumbo, osabambe isikhundla sesikhulumeli sebandla lePeople First utshele iStudio 7 ukuthi bazimisele ukusebenza lamabandla amanengi.
Uthi kungamanga ukuthi abanye babo balezandla ezilegazi.
Uphinde wathi kumele uhlelo lokwabela uzulu amashares amankampani emazweni olwe indigenization lubulala umnotho welizwe.
Ukuze lizwe okunengi ngodaba lolu hambani kubulembu beInternet ku – www.voandebele.com.
Kudaba olufanayo ngoLwesihlanu sizabe sixoxa loMnu. Isaac Mabuka umgcinisihlalo webandla leZapu ekhokhelwa nguMnu. Dumiso Dabengwa.