Umphathintambo wezemali, uMnu. Mthuli Ncube uthi imizamo yokuvuselela umnotho welizwe ihamba kahle njalo uzulu kumele akhengelele inguquko ezakubakhona kusiyafika inyanga kaMfufu lonyaka.
UNcube wethule amazwi la ngoLwesithathu esigodlweni sommeli weZimbabwe kwele Melika edolobheni leWashington DC.
UNcube uthe uhulumende uphakathi kohlelo lokwwehlukanisa amankampani akhe athiwa ngama parastatals ngesingisi afana leziphala zeGMB lenkampani yamandla kagetsi eyeZESA.
UNcube, ongafunanga ukuthi amazwi akhe athatshwe kumbe ukuthi athathwe umfanekiso kamabonakude, uthi amanye amankampani azamanyaniswa ingatsha zawo ukuze asebenze kuhle.
Uthi uhulumende kakhathazwa yizijeziso zenotho ngoba okufunwa ukuthi kwenziwe ukususwa izijeziso lezi okufana lokuhlonitshwa kwelungelo likazulu lokunye kuvele kuzenziwa.
UNcube uthi ilizwe leZimbabwe linothile okufunakalayo nje yikuthi kudonswe ndawonye okuyikho osekusenzakala ngoba kulenkulumo zamabandla ezombusazwe.
Izizalwane ze Zimbabwe ebezisemhlanganweni zisele zilembono ehlukeneyo ngokuthi ilizwe liqonda ngaphi ngalesi sikhathi.
UMnu. Quite Ncube ngomunye obesemhlanganweni lo.
UNkosazana Pearl Mathibe uthe inkulumo kaNcube ibinhle kodwa akusalayo yikuthi kubonakale izithelo zenhlelo zikahulumende ngoba esithi uNcube ubezwakala njengomuntu othengisa ubuhle belizwe nje kuphela.
Kodwa uMnu. Den Moyo, ophatheke kwezombusazwe uthe uNcube kazange aphendule kuhle imibuzo kade eyibuzwa ngoba ubefuna ukuthi kuzwakale sengathi ilizwe lisesimeni esihle wona umnotho usiya nganxele.
UMnu. Quite Ncube uthi lanxa umphathintambo Ncube ekhulume ngobuhle belizwe kunzima ukuthi izizalwane zeZimbabwe ezihlala emazweni afana leMelika zibuyele ekhaya ziyesungula amabhizimusi ngoba kungela siqiniseko sokuthi amabhzimusi abo awasoze ahuquluzwe.
UNcube utshele lumhlangano ukuthi uhulumende we Zimbabwe ulendlela akhulumisana ngazo lohulumende weleMelika okokuthi abantu bengayengwa yilokho okulotshwa zintathelizindaba zisithi akula kuzwana lohulumende kamongameli Donald Trump weleMelika.
