amalinks wokungena

Breaking News

Abongi Bakhalala Umsebenzi Kulandela Ukubhubha Komkhulu Wabo Okuthiwa Ubulewe yiCOVID-19


Bathi bafuna ukunikwa amaPPE kulandela ukubhubha komunye wabo. (Courtesy Image)

Abongi abakuhlangothi lwababelethisayo esibhedlela seHarare Central Hospital ngoLwesine bakhalele umsebenzi besithi bafuna ukuphiwa impahla yokuzivikela ekubambeni imikhuhlane efana legciwane leCoronavirus.

Lokhu kwenzakala ngemva kokuba esinye isiphathamandla sesibheldela lesi esesisaziwa njalo ngelokuthi Sally Mugabe Central Hospital, esinguMatron kuloluhlangothi, sibhubhe ngoLwesine ekuseni. Sicatshangelwa ukuba sibulewe ngumkhuhlane weCOVID-19.

Abongi laba bathi akekho obanakekelayo kulokho kungakho bethethe lelinyathelo ukuba kabayi kungena esibhedlela ngaphandle kokuthi banikwe impahla yokuzivikela.

Esinye isiphathamandla esimela abongi esibhedlela lesi, uMnu. Moses Sibanda, uthi ukubhubha kuka Matron kwethuse izisebenzi.

“Bahle bavumelana ukuthi khona abakwanisi ukungena emsebenzini beyesebenza njengoba omunye wabo, owayenguSupervisor wabo, esebulewe ligciwane. So, bona bathi hayi, namuhla kasenelisi ukungena emsebenzini. Kumele baqale besinike iPPE (personal protective equipment). Njengoba thina sonke singabantu abafaneleyo, sonke siyakwanisa ukufa ngegciwane leli. Bonke bayakhalala ukungena emsebenzini kodwa bakhona emsebenzini lobanje besebenza baphandle. Bathi namuhla kabasebenzi nxa bengaphiwanga iPPE ekwanileyo.”

Kulabanye abasemakhaya asebezisuse emphakathini ukuze bengatheleli abanye leligiwane ngemva kokutholakala ukuba balalo leligciwane.

Omunye wabo, uMnu. Taurai Kwenda uthi selesikhatshana ezivalele endlini esenzela ukungatheleli abanye umkhuhlane weCOVID-19.

“Sengilamalanga alitshumi selokhu ngaya kuself isolation. Sezilitshumi lanye insuku lokhe ngatholakalayo ngilawo lumkhuhlane, kusukela ngoMvulo weviki eliphelileyo. Akekho ngitsho loyedwa othe wazihlupha ukudinga ukuthi azwe nje ukuba sengisizwa njani, akekho ozihluphayo ngami. Munye kuphela othe wangithinta ukuthi azwe ukuba senginjani. Ungumngane nje lanxa eyisiphathamandla lapha esibhedlela, sesisebenze sonke owesikhathi eside. Angikholwa mina ukuthi wenze lokho ngoba ekhona omthumile ukuba akwenze lokho.”

UMnu. Itayi Rusike, ingcwethi kwezempilakahle engumqondisi wenhlanganiso yeCommunity Working Group on Health. ukhuthaza uhulumende ukuba enze okumele akwenze ukulondoloza abasebenza ezibhedlela laba.

Uthi kuyinto edanisayo ukuzwa abasebenza kuloluhlangothi bekhala ngokuthi basebenza bengelampahla edingakalao.

“Sizwa kuthiwa abasebenza ezibhedlela laba batholiswa iface mask eyodwa kuphela ngeviki, akwamukeleki lokho ngoba imikhuhlane eminengi itholakala izibhedlela njalo ziyingozi enkulu nxa kukhangelwa umkhuhlane lo weCOVID-19. Asingeke sayilwa limpi yokulwisana lomkhuhlane weCOVID-19 bengekho laba bantu, siyabadinga kakhulu. ”

Izolo kusihlwa umsekeli womphathintambo kugatsha lwezempilakahle, uDokotela John Mangwiro, utshele intathelizindaba ukuba uhulumende usebeke eceleni imali engama billion ayisikhombisa yokusebenzisa kuhlangothi lwezempilakahle.

“Ukuze basebenze bejabulile njalo siqhatshe ezinye izisebenzi ukungezelela kulezo ezikhona kanye lokuthenga impahla esetshenziswa ukuhlola amaPPEs, okunye okunenginengi okufana lama sanitizers kanye lokuthuthukisa izakhiwo lapha ezibhedlela.”

UDokotela Mangwiro utshele lumsakazo njalo ukuba abogatsha lwakhe bazahlolisisa ngokushesha udaba lwabongi laba.

Facebook Forum

XS
SM
MD
LG