UMongameli Emmerson Mnangagwa ukhuthaza abenhlanganiso ezisebenzelana lohulumende ukuba zibe lesineke lohulumende wakhe ngoba uzama ukuguqula umnotho welizwe.
UMnangagwa uphinde njalo wanxusa abamabandla ezombusazwe alokhe engakabi yingxenye yomanyano wePolitical Actors Dialogue ukuthi bangene kuPOLAD.
UMnangagwa utshele umbuthano wePOLAD owenzelwe eHarare international Conference Centre ngoLwesine ukuba abantu kababe lesineke.
Wengeza ethi akula enye inkundla yokuxoxisana ngentuthuko yelizwe kwezombusazwe lezomnotho ngaphandle kwePOLAD.
Kodwa isikhulumeli sogatsha lwabasakhulayo kubandla leMDC koBulawayo, uMnu. Swithern Chiroodza, uthi kabalandaba lePOLAD abayibona iyinkundla engelancedo.
Obemele inhlanganiso yeUnited Nations Development Programme, uMnu. Georges van Mortfort, uthi okumqoka yikuba ilizwe libe lombono okhangela ukuthuthuka kwelizwe.
UNkosazana Abigail Mupambi, owenhlanganiso ye #This Constitution, uthi iqakathekile imihlangano yaloluhlobo elenjengo yokwakha ilizwe.
Kodwa unobhala jikelele wenhlanganiso yezisebenzi eyeZimbabwe Congress of Trade Unions, uMnu. Japhet Moyo, uchothoza iPOLAD.
Umhlangano lo, obuqoqwe ngabohlangothi lwezamabhizimusi kuPOLAD (Thematic Committee on the Economy), ungenwe ngosomabhizimusi, inhlanganiso ezimela izisebenzi, abammeli bakwamanye amazwe eZimbabwe, abenhlanganiso ezisebenzisana lozulu ama Development Partners kanye leziphathamandla zengatsha ezehlukeneyo zikahulumende.
