amalinks wokungena

Breaking News

Iqembu leCaps United Liyaqolotsha Phezu Kwengalane yePSL


Caps United
Caps United

Iqembu leCAPS United yilo eselihlezi phezu kwengalane yesigaba sePremier Soccer League (PSL) ngemva kokunqoba elikwenze ele Harare City nge 1 ka nya ngoLwesithathu.

Limpumela itshiye iqembu leCAPS selilemiklomelo engamatshumi amane lowodwa (41).

Iqembu ebelihlezi esiqongweni phambilini kwemidlalo yanamuhla eleZPC Kariba lilemiklomelo engamatshumi amane njalo lehle layahlala endaweni yesibili.

Komunye umdlalo odlalwe namhla iqembu leYadah linqotshwe nge 2 ka nya liqembu le Bulawayo Chiefs okuyimpumela etshiye iqembu le Chiefs selilemiklomelo engamatshumi amabili lowodwa (21) kodwa lilokhu lisendaweni eyesibili nxa usuka emsileni wengalane.

Kulamaqembu omdlalo wenguqu alitshumi lesithupha angene kumncintiswano walonyaka owenkezo yeTownsend and Butcher wona ozaqala ngempelaviki ezayo.

Umncintiswano wenkezo yeTownsend and Butcher ungena kumnyaka wamatshumi ayisithupha lambili lonyaka njalo uhlelo olokuba amaqembu azadlala njani luqhutshwe namhla emini.

Lumncintiswano ngowamaqembu adlala kusigaba esaziwa ngegama elithi area zones wona ahlanganisela isigaba esilodumo eseBulawayo Amateur Football Association kumbe iBAFA ngamafitshane.

Isiphathamandla senhlanganiso ebona ngokuqhutshwa komdlalo webhola lenyawo kwele Zimbabwe eye Zimbabwe Football Association, iZIFA ngamafitshane, uCharles Chunda, yena omele isigaba sama area zones, ubonge kakhulu usekelo lwabe Townsend & Butcher lona abaqhubekela phambili beluthola ngesikhathi isimo somnotho singekho sihle elizweni.

“Ama sponsors awatholakali kunzima kodwa uPeter (Leondios) ulothando lomdlalo wenguqu njalo ngizakwengeza ngithi lemuli yakhe layo ilothando lomdlalo wenguqu ngitsho lasibi sabantwabakhe bayasekela inhlelo zethu,” kutsho uChunda.

Obengumhlonitshwa kulumkhosi wokuhlela ukuba amaqembu azadlala njani ngu Allan Mpofu yena ongumgcinisihlalo wenhlanganiso ye ZIFA Bulawayo Province.

UMpofu utshayele ihlombe abaqoqi bomncintiswano weTownsend and Butcher ngokwenelisa kwabo ukuthola usekelo oluvela emulini yako Leondios.

“Kuhle lokhu okwenzakalayo njalo sizakhulumisana lomgcinisihlalo weBAFA ukuze sizwe ukuba bakwenelisa njani lokhu.

Lathi ngakwelinye icele bakhona esikhulumisana labo ukuba besiphathise kowethu umncintiswano esikhangelele ukuba ngomnyaka ozayo uzaqhutshwa ekuqaleni komnyaka,” kutsho uMpofu

Amaqembu angene kumncintiswano walonyaka ngagoqela ele Mpilo United lona elizadlala lele Unity Village, ele Victory Fellowship lona elizadlala lele Lochard, ele Hilltop elizadlala lele United FC, ele Anolle Castings elizadlala lele Rebels, ele Matabeleland High City lona elizadlala lele Chronicle NGA, ele Willowgate lona elizadlala lele Joker, ele Safeguard lona elizadlala lele Lobels, kanye lele Sondelani elizadlala lele Flying Stars.

Umncintiswano walonyaka uzaqala ngeSonto mhla zingamatshumi amabili lambili njalo yonke imidlalo izadlalelwa enkundleni eziphandle kwenkundla ye Barbourfields.

please wait

No media source currently available

0:00 0:02:34 0:00


XS
SM
MD
LG