amalinks wokungena

Breaking News

Bathengiwe Na Abakhuluma Kukhomishini Ehlolisisa Ukudutshulwa Kwabantu Libutho?


Zimbabwe Elections

Abanye abantu abakhulume ngoLwesithathu kukhomishini ehlolisisa ukudutshulwa kwabantu abayisithupha lonyaka kusanda kwenziwa ukhetho lwelizwe bethese ibandla leMovement for Democratic Change elikhokhelwa nguMnu. Nelson Chamisa umlandu wokudala ukuxokozela okwaba khona eHarare.

Abanye njalo baveze ukuthi amasotsha adubula abantu mahlayana nje okwenza ukuthi kufe abantu ababengonanga lutho.

Omunye wabafakaze kukomishini le, uMnu. Johanes Mutanda osebenzela ibandla le ZANU PF, utshele ikhomishini le eyabunjwa guMongameli Emmerson Mnangagwa, ukuthi kulabantu abafika amakhulu amathathu abafika emawofisini ebandla leli bamtshaya labanye bakhe ngensimbi.

Uthe abantu laba, okukhanya engani kwakungabalandeli beZanu PF, babhidliza impahla etshiyeneyo. UMutanda uthe badla phansi bebona ukuthi bengalimali kumbe babulawe ngabantu laba.

Kulabanye njalo abakade belalele obekukhulunywa kukhomishini le abagoqela uMnu. Justin Sakala, uMnu. Nkosana Dlamini labanye abathe umbuthano onje uzanceda ilizwe leZimbabwe ukuthi livimbe ukukhahlanyezwa kwabantu.

Owayemele ibandla leZANU PF encintisa kukhetho luka khansili ku Ward 6 eHarare, uNyasha Zenda, laye ufakaze phambi kwalikhomishini esithi abatsha beMDC babefuna ukumtshisela ebhasini elaselilumethe umlilo eceleni kwewofisi yeZANU PF.

Uthi wenelisa ukuphunyuka wacatsha ngemva kwemota eyayimile okwaba yikusila kwakhe.

UNkosikazi Marian Chidamba, omunye wabafazi, uveze ubuhlungu obukhulu lapho elandisa ngokudutshulwa komnawakhe ngabebutho esehlisa izinyembezi.

Uthe wafika ebona labo abagezisa izimota edolobheni bevala ngenhlabathi lapho awophela khona umnawakhe wamfica vele sokuyisidumbu eseqanda.

Kodwa uMnu. Themba Sihwa, omunye wabakade belalele kunikwa ubufakazi, uthi umangaliswa yibunengi bobufakazi babantu abamele iZANU PF okungadala ukuthi abantu bacine bengemukeli impumela yale inhlonisiso.

“Besilandela ikhomishi yokuhlolisisa ukudutshulwa kwabantu mhlaka 1 Ncwabakazi ngemva kokhetho lwethu lapha eZimbabwe, kukhanya bayasebenza kodwa asikwazi kumbe ngabantu abathembekayo kumbe ngabantu abathengiweyo, ababhadalweyo ukuthi bekhulume into ezinjani ngoba inenge labo likhuluma becothoza iMDC kodwa inengi licabanga ukuthi amasotsha yiwo awaphambanisayo ngokudubula abantu kodwa labo abafakazayo bakhomba Imdc. Asikwazi ukuthi abantu laba bayathembeka yini kodwa siyathandabuza ukuthi abantu bakhona abala qiniso”

Ikhomishini le ikhangelelwe ukuqhubeka ngomsebenzi isizwa ubufakazi bonke basehlakalo sikamhla ka 1 Ncwabakazi ibisizophetha ngokwethulwa umbiko oveza imbangela yokwenzakalayo.

Uzulu ukhangelele ukuthi uhulumende ajezise labo abazafunyanwa ukuthi bephula umthetho ikakhulu ukuthi kwazakale ukuthi ngubani owavumela ibutho ukuthi lizedubula abantu.

Facebook Forum

XS
SM
MD
LG